İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 466 Hüküm no: 543 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Alemdâr b. Mustafa’nın, Hacıoğlu Halil b. Ahmed’e arpacı dükkânı gediğinden borcuna Kınıkoğlu Hüseyin Beşe’nin kefil olduğu 440 te’cîlen edâya tenbîh Ma‘rûz Arpacı esnâfından Hacıoğlu Halil b. Ahmed nâm kimesne meclis-i şer‘-i münîrde yine esnâf-ı merkūmeden Hasan Alemdâr b. Mustafa nâm kimesne mahzarında Arpacı Kınıkoğlu Hüseyin Beşe b. Mehmed hâzır olduğu hâlde bin iki yüz on altı senesi Cumâdelâhıresi gurresinde merkūm Hasan Alemdâr malımdan ve yedimden iktirâz ve kabz eylediği beş yüz guruş deyni mukābelesinde İstanbul’da Bahçekapısı hâricinde bakkāl dükkânına muttasıl bir bâb arpacı dükkânı derûnunda mevcûde beyne’l-esnâf gedik tâ‘bir olunur müstakillen yedinde mülkü olan âlât-ı lâzıme-i ma‘lûmeyi istiğlâl tarîkiyle bana bey‘ ve teslîm ve husûs-ı mezkûru huzûr-ı Müslimînde ikrâr ve işhâd ve işbu bir kıt‘a temessükü yedime i‘tâ etmişdi lâkin fi’l-hakīka meblağ-ı mezbûr deyn ve âlât-ı lâzıme-i merkūme rehn olmağla meblağ-ı mezbûru bana edâ-birle âlât-ı lâzıme-i merkūmeyi rehniyetden fekke mezbûr Hasan Alemdâr’a tenbîh olunmak murâdımdır deyü da‘vâ eylediğimde ol dahi cevâbında ber-vech-i muharrer ikrârını ikrâr lâkin meblağ-ı mezbûrun üç yüz seksen guruşu karz mâ‘adâ yüz yirmi guruşu bilâ-devr ribâ-yı mahzdır deyü ol mikdârda beni def‘a tasaddî ve ol vechile beynimizde ba‘de’l-münâza‘a bâ-vesâtet-ı muslihîn ben ber-minvâl-i muharrer beş yüz guruş müdde‘âmdan merkūm Hasan Alemdâr ile bi’t-tav‘ ve’r-rızâ dört yüz kırk guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ beş yüz guruşa varınca ziyâdesi olan altmış guruşa müte‘allika da‘vâdan mezbûrun zimmetini kabûlü hâvi ibrâ ve iskāt eyledim deyü mukırr-ı merkūm Halil’in bi’l-cümle sâdır olan takrîr-i meşrûhunu mezbûr Hasan Alemdâr tasdîk ve ibrâdan müstesnâ bedel-i sulh-i merkūm dört yüz kırk guruş zimmetinde sahîhan müdde‘î-i merkūma deyni olduğunu tâyi‘an ve kat‘iyyen ikrâr u i‘tirâf ve rehin olan gedik-i mezkûru îd-i saîd akabinde füruht-birle ve îfâ-yı deyn ederim deyü istimhâl eyledikden sonra hâzır-ı merkūm Kınıkoğlu Hüseyin Beşe dahi deyn-i meblağ-ı mezbûr dört yüz kırk guruşa tarefeynden bi’l-emr ve’l-kabûl kefâlet-i mutlaka-yı sahîha ile kefîl ve zâminim dedikde mezbûr Halil dahi kefâlet-i mezkûreyi kabûl edip vech-i meşrûh üzere imhâl eylediği İstanbul mahkemesinde tescîl ve huzûr-ı âlîlerine i‘lâm olundu. Fî-15 Ş sene [1]217