İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 467 Hüküm no: 544 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acı Manuk v. Delot’un Kapı aletleri esnaflığından çıkarıldığı Kapı âlâtçı esnâfından ihrâc Ma‘rûz Âsitâne-i aliyyede Tavukpazarı nâm mahalde vâki‘ kapı âlâtı tasnî‘ eden esnâfın yiğitbaşısı Arotin ve ihtiyâr ve ustalarından Niko Timus ve diğer Arotin ve Agob ve Ohannes ve Malkon ve Bağdisar ve Estefan ve Haçador ve diğer Kirkor ve Begos ve Serupa ve Bedros ve Kerupa ve Serkiz vesâir mazbûtü’l-esâmî zimmîler meclis-i şer‘-i münîrde Acı Manuk v. Delot nâm zimmî muvâcehesinde mersûm Manuk zimmî esnâfımızdan olup lâkin kendi halinde ırzıyla mukayyed ve kesbiyle meşgūl olmayıp beynimizde câri nizâmımızın ihtilaline bâ‘is ve nizâ‘ ve mücâdeleye bâdi ve beynimizde ilkā-i fesâda sebeb olup bi’d-defa‘ât loncamıza çağrılıp kendiye nush u pend olundukda kat‘an mütenebbih olmayıp ızrârından ısrâr üzere olmağla ol vechile mesfûr Manuk zimmîden emn ve rahatımız bi’l-külliye meslûb olmuşdur deyü iştikâ mesfûrun türlü türlü harekât-ı nâ-marziyyeye ibtidârını ve sû-i hâlini muvâcehesinde ihbâr ve fîmâ ba‘d esnâf-ı mezkûreye duhûl etmeyip kesb-i âhara şürû‘ etmek üzere mesfûr Manuk zimmînin esnâf-ı merkūmeden ihrâc olunmasını bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-27 min N sene [1]217