İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 474 Hüküm no: 555 Orijinal metin no: [82a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yiğitbaşı Süleyman Beşe’nin, dikici esnaflığından çıkarılması Dikici esnâfından ihrâc Ma‘rûz Âsitâne-i aliyyede Tekfur Sarayı’nda kâin Yahûdi tâifesine mahsûs ancak pabuç işleyen dikici esnâfının ustalarından Serkiz v. Tagi ve Begos ve Mikail ve Takur zimmîler ile Yahûd pabucu bey‘ eden haffâf tâifesinden Ahmed nâm kimesne ile Mosi ve Hayem ve Avram ve Çelbon ve İlya ve Kamal ve Pako ve diğer Haym ve Yasef ve Danyel ve Mosi vesa’ir Yahûdiler meclis-i şer‘-i münîrde dikicibaşı İbrahim Ağa hâzır olduğu hâlde esnâf-ı merkūmeden köşe ustası tâ‘bir olunur yiğitbaşıları Süleyman Beşe muvâcehesinde merkūm Süleyman Beşe esnâfımızdan ve köşe ustası olup lâkin kendi halinde ırzıyla mukayyed olmayıp ve kâr u kesbiyle meşgūl olmayıp köşe ustası ve yiğitbaşı olmak takrîbiyle içimizde ta‘yîn-i kesbeylediğine binâen her birimizi gûnâ-gûn bahâne ile tecrîm ve tağrîm ve beynimizde câri nizâm-ı kadîmimizin ihtilâline bâ‘is ve münâza‘a ve müşâcereye bâdi ve beynimizde ilkā-i fesâda sebeb olup bi’d-defa‘ât kendiye tenbîh [82b] olundukda kat‘an mütenebbih olmayıp ızrârından ısrâr üzere olmağla merkūm Süleyman Beşe’den emn ve rahatımız bi’l-külliye meslûb olmuşdur deyü iştikâ ve merkūmun türlü türlü harekât-ı nâ-marziyyeye ictisârını ve sû-i hâlini muvâcehesinde ihbâr ve fîmâ ba‘d esnâf-ı merkūmeye duhûl etmeyip kesb-i âhara şürû‘ etmek üzere merkūm Süleyman Beşe’nin esnâf-ı merkūmeden ihrâc olunmasını cümlesi bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-15 min-Şevvâl sene [1]217