İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 474 Hüküm no: 556 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. İvaz’ın, Rüstempaşa vakfından icareli altmış bab oda ve dükkân içerisindeki gediğini Ali Ağa b. Hasan’a sattığı Sultan odalarında oda gediği mübâya‘ası Ma‘rûz İstanbul’da Kumkapı kurbünde Bali Paşa Mahallesi’nde mütemekkin Arakil v. İvaz nâm zimmî meclis-i şer‘-i münîrde bâ‘isü’l-i‘lâm Zenneci Ali Ağa b. Hasan mahzarında takrîr-i kelâm edip meteveffâ Rüstempaşa Vakfı musakfātından İstanbul’da Mahmud Paşa Câmi‘-i şerîfi kurbünde sultan odaları demekle ma‘lûm bir bâb hân derûnunda kâin fevkānî ve tahtânî altmış bâb oda ve kahvehân-ı mezkûr dâhilinde kapı arasında kâin iki bâb dükkânlar ve hân-ı merkūmdan olmak üzere hân-ı mezkûr hâricinde altı bâb dükkânlar derûnlarında mevcûde gedik tâ‘bir olunur işbu bir kıt‘a fermân-ı âlî mantûkunca mülk-i müşterâm olan âlât-ı lâzıme-i ma‘lûmelerden hân-ı mezkûr fevkānîsinde sol tarafda altıncı ve yedinci iki bâb odaların beyne’l-hıref gedik tâ‘bir olunan âlât-ı lâzıme-i ma‘lûmelerini tarefeynden bi’l-icâb ve’l-kabûl mezbûr Ali Ağa’ya bi-safka-i vâhide bin guruş semen-i makbûza bâten ve sahîhan bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra mebî‘-i mezbûrun tağrîr ve gabnine müte‘allika âmme-i de‘avîden her birimiz âharın zimmetini ibra ve iskāt ve her birimiz âharın ibrâsını kabûl edip fîmâ ba‘d zikr olunan iki bâb oda gediklerinde benim aslan ve kat‘an alâka ve medhalim kalmayıp mezbûr Ali Ağa’nın mülk-i müşterâsı ve hakk-ı sırfı olmuşdur dedikde merkūm Ali Ağa dahi tasdîk etmeğin sâlifü’l-beyân iki bâb odaların gedikleri başmuhâsebe kaleminde mesfûr Arakil zimmî ismine olan kaydı ref‘ ve terkīn ve fermân-ı âlîşân-ı mezkûrdan ihrâc-birle mezbûr Ali Ağa üzerine kayd ve yedine sûret i‘tâ buyrulmak bâbında istid‘â-yı inâyet eyledikleri İstanbul Mahkemesi’nden huzûr-ı âlîlerine i‘lâm olundu. Fî-19 min-Şevvâli’l-mükerrem sene [1]217