İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 475 Hüküm no: 557 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Ömer’in, Agob v. Bedros’a olan borcunu kefaletinden dolayı Salih b. Süleyman’ın ödemesi gerektiği 150 guruş şâlî semeninden bâkī kefâleten edâya tenbîh Ma‘rûz İstanbul’da Sofcular hânında mütemekkin sâhib-i arzuhâl Boyacıoğlu Şâlîcı Agob v. Bedros nâm zimmî meclis-i şer‘-i münîrde Mısır tüccârından derûn-ı arzuhâlde mezkûrü’l-ism Muğlavî el-Hâc Salih b. Süleyman mahzarında bin iki yüz dokuz senesi Zilka‘desinin on birinci günü târihiyle muvarrah işbu bir kıt‘a temessük mantûkunca benim gāib ani’l-beled tüccârdan Muğlavî el-Hâc İsmail b. el-Hâc Ömer nâm kimesne zimmetinde ma‘lûmü’z-zirâ‘ Ankara şâlîleri semeninden hakkım olan dört yüz yirmi guruşa işbu mezbûr el-Hâc Salih tarafından bi’l-emr ve’l-kabûl kefâlet-i mutlaka-yı sahîha ile kefîl ve zâmin olup meblağ-ı mezbûrun yüz yirmi guruşunu bundan akdem asîl-i mezbûrdan ahz etmemle bâkīsi olan üç yüz guruşu kefâletine binâen mezbûr el-Hâc Salih’den taleb ederim deyü tasaddî eylediğim da‘vâmdan bâ-vesâtet-ı muslihîn bi’t-tav‘ ve’r-rızâ mezbûr el-Hâc Salih ile yüz elli guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ üç yüz guruşa varınca ziyâdesi olan yüz elli guruşa müte‘allika da‘vâdan kefîl-i mezbûr el-Hâc Salih ile asîl-i mezbûr el-Hâc İsmail’den her birinin zimmetini kabûlü hâvi ibrâ ve iskāt eyledim deyü mukırr-ı zimmî-i mersûmun sâdır olan bi’l-cümle takrîr-i meşrûhunu mezbûr el-Hâc Salih tasdîk ve sâlifü’l-beyân ibrâdan istisnâ olunan bedel-i sulh-i merkūm yüz elli guruş zimmetinde müdde‘î-i mesfûra sahîhan deyni olduğu kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihî meblağ-ı mezbûr yüz elli guruşun müdde‘î-i mersûm Agob zimmîye bi’l-külliye edâsıyla mezbûr el-Hâc ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-20 min-Şevvâl sene [1]217