İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 476 Hüküm no: 558 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Süleyman’ın, Agob v. Bedros’a olan borcunu ödemesi gerektiği 55 guruş hüküm Ma‘rûz İstanbul’da Sofcular hânında mütemekkin Boyacıoğlu Şâlîci Agob v. Bedros nâm zimmî meclis-i şer‘-i münîrde Mısır tüccârından Muğlavî el-Hâc Salih b. Süleyman mahzarında mezbûr el-Hâc Salih zimmetinde bundan akdem yedimden ve malımdan iştirâ ve ahz eylediğim zirâ‘ ve fiyâtı beynimizde ma‘lûm Ankara şâlîleri semeninden cem‘an altı yüz beş guruş hakkımın beş yüz elli guruşunu bana def‘ ve teslîm ben dahi kabz etmemle bâkīsi olan elli beş guruşu mezbûr el-Hâc Salih’den hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin müdde‘î-i mesfûr Agob zimmî kabzını mu‘terif olduğu meblağ-ı mezbûr beş yüz elli guruşa benimle sulh olup mâ‘adâ elli beş guruşa müte‘allika da‘vâdan zimmetimi kabûlümü hâvi ibrâ ve iskāt etmişdi deyü eylediği def‘ine ikāmet-i beyyineden ızhâr-ı acz edip talebiyle mersûm Agob zimmî vech-i şer‘î üzere tahlîf olunmağın mûcebince meblağ-ı bâkī-i merkūm elli beş guruşun müdde‘î-i mesfûr Agob zimmîye edâsıyla mezbûr el-Hâc Salih ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-20 L sene [1]217