İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 476 Hüküm no: 559 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çıkrıkçı Abdi b. Ali ve ebeveyni kayıkçı Ali ve Zeliha’nın, yabancı kişileri hanelerine almaları ve kötü halleri sebebiyle mahalleden çıkarıldıkları Mahalleden ihrâc Ma‘rûz İstanbul’da Molla Zeyrek kurbünde Timurhan Mahallesi İmâmı Mustafa Efendi ve ahâlîsinden Osman Ağa ve el-Hâc Süleyman ve Mehmed Ağa ve İbrahim ve Mehmed Akif Ağa ve Mehmed Beşe ve İbrahim Beşe ve es-Seyyid Abdi Beşe ve Molla Mehmed Said ve el-Hâc Ali ve Mehmed Beşe vesâir otuz neferden mütecâviz cema‘at-i Müslimîn meclis-i şer‘-i münîrde mahalle-i mezbûre sâkinlerinden Çıkrıkçı Abdi b. Ali nâm kimesne muvâcehesinde merkūm Abdi ve ebeveyni kayıkçı Ali ve Zeliha nâm zevcân mahallemiz sükkânından olup lâkin kendi hallerinde ırzıyla mukayyedler olmayıp nâ-mahremden ictinâbı olmayan mechûletü’l-ahvâl avratları menziline idhâl ve fuhşiyâta dâir ef‘âl-i şenî‘ayı irtikâba ictisâr etmeleriyle bi’d-defa‘ât kendilere tenbîh ve tekîd olundukda kat‘an mütenebbihler olmayıp mütecâsir oldukları ef‘âl-i kabîhalarını icrâda ısrâr üzere olmalarıyla merkūm Abdi ile ebeveyni zevcân-ı merkūmândan bi’l-külliye emn ve rahatımız meslûb olmuşdur deyü iştikâ ve merkūm Abdi muvâcehesinde sû-i hâllerini ihbâra ve mahalle-i mezbûreden hurûclarını cümlesi bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-23 min-Şevvâl sene [1]217