İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 478 Hüküm no: 561 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağ kapanı nazırlığına Hacı Ahmed’in tayin edildiği Yağ kapanı nâzırlığı i‘lâmı Ma‘rûz Memleket-i Bağdâd’dan envâ‘-ı revgan ve ecnâs zehâyir getiren Galata yağ kapanı tüccârının vürûd eden don ve çerviş yağlarının hıfz ve hirâsetine i‘âne için kapan-ı mezkûra sâbıkā nâzır ta‘yîn olunup bundan akdemce azl olunan sâhib-i arzuhâl Arabzâde el-Hâc Ahmed’in nâzırlığı husûsunu i‘lâm eyleyesin deyü bu dâ‘îlerine hitâben şerefrîz-i sudûr eden fermân-ı âlîlerine imtisâlen kapan-ı mezkûr nâzırı olan es-Seyyid Veliyüddin hasbe’l-iktizâ azl olunup yerine kemâl-i sadâkat ve istikāmetle nezâret ve hizmet-i lâzımesini kemâ-yenbagī rü’yet edip bi’l-cümle vürûd eden don ve Çerviş yağlarının bir dirhemi bilâ-emr-i âlî mahâll-i âhara sarf olunmasına iğmâz-ı ayn ve müsâmaha ile hiyânet etmemek şartıyla mezbûr el-Hâc Ahmed nâzır nasb ve ta‘yîn olunduğunu hâvi yedine bir kıt‘a fermân-ı âlîşân inâyet ve ihsân buyrulmak bâbında istid‘â-yı inâyet eylediği İstanbul Mahkemesi’nden huzûr-ı âlîlerine i‘lâm olundu. Fî-19 min-Şevvâl sene [1]217