İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 478 Hüküm no: 562 Orijinal metin no: [83a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atike bt. Ali’nin, kötü hali ve geçimsizliği sebebiyle mahalleden çıkarılması Mahalleden külliyen ihrâc Ma‘rûz İstanbul’da Edirnekapısı dâhilinde Neslişan Sultan Mahallesi İmâmı Hüseyin Efendi ve ahâlîsinden Uncu es-Seyyid Mehmed Çelebi ve Kolçavuşlarından Halil Çavuş ve Münâdî es-Seyyid İbrahim ve Halil Ağa ve Yasinci Abdi Beşe ve Muhallebici es-Seyyid Ali Beşe vesâirleri meclis-i şer‘-i münîrde sâhibe-i arzuhâl mu‘arrefetü’z-zât Atike bt. el-Hâc Ali nâm Hatun muvâcehesinde merkūme Atike Hatun mahallemizde sâkine olup lâkin kendi halinde ırzıyla mukayyede olmayıp bed-zebân ve hadîdetü’l-lisân olup her birimize türlü türlü elfâz-ı kabîha ile şetm ve itâle-i lisân eylediğinden mâ‘adâ nâ-mahremden ictinâbı olmamağla mechûletü’l-ahvâl rical ve nisâyı menziline idhâl ve fuhşiyâta dâir ef‘âl-i şenî‘ayı irtikâba ictisâr etmekle bi’d-defa‘ât kendiye tenbîh olundukda kat‘an mütenebbih olmayıp mütecâsire olduğu harekât-ı nâ-marziyesinde ısrâr üzere olmağla [83b] merkūmenin harekât-ı nâ-marziyyesinden emn ve rahatımız meslûb olduğuna binâen ve bundan akdem Ahi Çelebi mahkemesinde mezbûr ile murâfa‘adan yedimize verilen i‘lâm mantûkunca mahalle-i mezbûreden ihrâc olunmuşken bu esnâda ber-takrîb yine mahalle-i merkūmede menzil-i sâbıkına duhûl ve sâkine olmak dâ‘îyesinde olmağla mezbûre Atike’den emn ve rahatımız bi’l-külliye meslûbdur deyü iştikâ ve merkūmenin sû-i hâlini ihbâr ve mahalle-i merkūmeden ke’l-evvel hurûcunu cümlesi bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-25 min-Şevvâl sene [1]217