İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 479 Hüküm no: 563 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Münevvere bt. İbrahim Efendi’nin, Alacacı Takfur v. Bedros aleyhine açtığı davanın reddedildiği Elmas çiçek da‘vâsı zevcinin huzûruna tevkīf Ma‘rûz Sâhibe-i arzuhâl mu‘arrefetü’z-zât Şerîfe Münevvere bt. es-Seyyid İbrahim Efendi nâm hatun meclis-i şer‘-i münîrde derûn-ı arzuhâlde merkūmü’l-ism Alacacı Takfur v. Bedros zimmî muvâcehesinde zevc-i sâbıkım olup hâlâ Mısr-ı Kahire’de sâkin hâcegân-ı dîvân-ı hümâyûndan Osman Nesim Efendi târih-i i‘lâmdan altı sene mukaddem zevciyet beynimizde kāime iken malımdan bin yedi yüz guruş kıymetli elmas başlı bir çift bilezik ve beş yüz elli sekiz guruş kıymetli etrâfı altı aded elmas taşlı ortası zümrüd bir yüzük ve dört yüz elli guruş kıymetli hayme resminde bir elmas çiçek ve üç yüz guruş kıymetli mücevher bir altın sa‘at ve beş yüz guruş kıymetli altı parmak bir rızâyî şalımı alıp kendi mülkü olmak üzere mesfûr Takfur zimmîden iktirâz ve kabz eylediği deyni mukābelesinde zimmî-i mersûme fuzûlî rehin ve teslîm edip lâkin zikr olunan sa‘at ve şal ve halılar benim mülküm olup gāib-i mersûm Osman Nesim Efendi benim iznimsiz rehn etmiş olmağla ben mücîze olmadığıma binâen eşyâ-i mezkûreyi mersûm Takfur zimmîden taleb ederim deyü takrîr-i meşrûhu üzere eşyâ-i mezkûreyi gāib-i mezbûr Osman Nesim Efendi’nin zimmîyi mersûme rehin ve teslîm eylediğini mu‘terife iken mezbûrun gıyâbında zimmî-i mesfûrdan tasaddî eylediği da‘vâsı mesmû‘a olmadığından mâ‘adâ istikşâf-ı hâl için mersûm Takfur zimmî istintak olundukda husûs-ı mezkûru külliyen münkir olmağla müdde‘iye-i mezbûrenin da‘vâ-yı mezkûreyi gāib-i mezbûrun huzûruna tevkīf olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-19 min-Şevvâl sene [1]217