İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 480 Hüküm no: 564 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Ömer’in, Sultan Abdülhamid Han vakfından icareli bir bab kasap dükkânı gediğinin yarım hissesine malik olduğu gösterir temessükünü kaybettiği Kasab gediği temessükü zayiden istid‘â i‘lâmı Ma‘rûz Hüdâvendigâr-ı sâbık cennet-mekân firdevs-âşiyân Sultan Abdülhamid Han aleyhi’r-rahmeti ve’l-Gufrân hazretlerinin evkāf-ı şerîfesi mülhakātından Yedikule haricinde vaki‘ on aded ganem selhhânelerinden beşinci selhhâneye merbût kasab dükkânlarından Üsküdar kazâsına tâbi‘ Kartal kasabasında kâin bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf-ı şâyi‘ine vakf-ı müşârun-ileyh mütevellîsi temessüküyle mutasarrıf olduğu ber-vech-i âtî ihbâr olunan Halil b. Ömer nâm kimesne meclis-i şer‘-i münîrde vakf-ı müşârun-ileyhin kāimmakām-ı mütevellîsi tarafından mürsel vekîl-i müsecceli Halil Efendi b. Ahmed ile hâssa kasabbaşısı İzzetlü Mustafa Ağa tarafından mürsel kassabân kethüdâsı İsmail ve kasab ustalarında es-Seyyid İbrahim ve Mehmed vesâirleri hâzır oldukları hâlde takrîr-i kelâm edip dükkân-ı mezkûr derûnunda gedik tâ‘bir olunan âlât-ı lâzıme-i ma‘lûmenin nısf-ı şâyi‘i benim ber-vech-i meşrûh taht-ı tasarrufumda olup lâkin cânib-i vakf-ı müşârun-ileyhden yedime verilen temessük bi-kazâillâhi te‘âlâ zâi‘ olmağla nısf-ı âlât-ı lâzıme-i mezkûrenin zabt ve tasarrufumuz için taraf-ı vakıfdan kaydı mûcebince zâyi‘den yedime temessük i‘tâsı matlûbum olmağla hakīkat-i hal hâzirûn-ı mezbûrûndan istifsâr ve istihbâr olunsun dedikde fi’l-hakīka gedik tâ‘bir olunan âlât-ı lâzıme-i mezkûrenin nısf-ı şâyi‘i işbu merkūm Halil’in ve nısf-ı şâyi‘-ı âharı el-Hâc Ahmed b. Veliyüddin uhdelerinde olduğunu kethüdâ ve kasab ustaları hâzirûn-ı mezbûrûn alâ-tarîkı’ş-şehâde haber verdiklerinden mâ‘adâ mezbûr Halil’in yedinde olup meclis-i şer‘de ibrâz eylediği arzuhâl hâmişinde mastûr defter-i vakıfdan muhrec derkenârdan dahi müstebân olmağla nısf-ı âlât-ı mezkûrenin zabt ve tasarrufu için cânib-i vakf-ı müşârun-ileyhden kaydı mûcebince zâyi‘den merkūm Halil yedine temessük i‘tâ olunmak bâbında istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-23 min-Şevvâl sene [1]217