İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 480 Hüküm no: 565 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. İbrahim’in, Sultan Abdülhamid Han vakfından icareli üç bab kasap dükkânı gediğini Mehmed b. İsmail’e devrettiği Kasab Ma‘rûz Hüdâvendigâr-ı sâbık cennet-mekân firdevs-âşiyân Sultan Abdülhamid Hân hazretlerinin evkāf-ı şerîfesi mülhakātından Yedikule hâricinde kâin on aded ganem selhhânelerinden birinci selhhâneye merbût kasab dükkânlarından medîne-i Üsküdar’da Toptaşı nâm mahalde bir bâb ve Atpazarı nâm mahalde bir bâb ve kapı altı nâm mahalde bir bâb cem‘an üç bâb kasab dükkânları derûnlarında mevcûde beyne’l-esnâf gedik tâ‘bir olunur âlât-ı lâzıme-i ma‘lûmelerin nısf-ı şâyi‘lerine vakf-ı müşârun-ileyh mütevellîsi temessüküyle mutasarrıf olan Mustafa b. İbrahim meclis-i şer‘-i münîrde hâssa kasabbaşısı İzzetlü Mustafa Ağa tarafından mürsel kasablar kethüdâsı İsmail vesâir kasab ustaları hâzır oldukları hâlde âlât-ı lâzıme-i mezkûrelerini nısf-ı şâyi‘larına mutasarrıf olan bâ‘isü’l-i‘lâm Mehmed b. İsmail muvâcehesinde takrîr-i kelâm edip zikr olunan üç bâb dekâkîn derûnlarında mevcûde gedik tâ‘bir olunur âlât-ı lâzıme-i mezkûrelerden mutasarrıf olduğum nısf hisse-i şâyi‘a-i mezkûrelerimi hüsn-i rızâ ve tayyib-i hatırımla bedel-i ma‘lûm ve makbûz mukābelesinde bâ-re’y-i mütevellî mezbûr Mehmed’e ferağ-ı mu‘teber-i kat‘îyle ferağ ve tefvîz eylediğimde ol dahi tefevvüz ve kabûl edip ba‘de’l-yevm âlât-ı lâzıme-i merkūmelerde benim kat‘an alâka ve medhalim kalmayıp mecmû‘u [84a] mezbûr Mehmed’in hakk-ı müfevvezi ve dâhil-i havza-i tasarrufu olmuşdur dediğini mezbûr Mehmed tasdîk etmeğin nısf-ı âlât-ı mezkûreler fâriğ-i merkūm Mustafa’nın temessükü taraf-ı vakıfdan terk ve hıfz olunup ferağından mezbûr Mehmed üzerine yedinde olan temessükü hâmişine tahrîr ve temhîr ve defter-i vakf-ı şerîfe ba‘de’l-kayd temessükü i‘tâ buyrulmak bâbında istid‘â eylediği İslâmbol Mahkemesi’nden huzûr-ı âlîlerine i‘lâm olundu. Fî-11 min-Şevvâli’l-mükerrem sene [1]217