İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 481 Hüküm no: 566 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Ahmed’in, malik olduğu bir bab tütüncü gediğini Ahmed b. Mehmed’e sattığı Tütüncü gediği mübâya‘ası Ma‘rûz Maden kaleminde mukayyed tütüncü gediklerinden İstanbul’da Zindânkapısı dâhilinde Tahmîs kurbünde Çavuşbaşı Hânı tahtında kâin taş mahzenlerden Yenikapılızâde Derviş Ağa mahzeni demekle ma‘lûm bir bâb tütüncü mahzeni derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmenin tedâvül-i eyâdî ile bâ-sened-i şer‘î mâlikesi olduğu tütüncüler kethüdâsı İbrahim b. Ahmed ve Yiğitbaşı Ali b. Hüseyin ihbârlarıyla mütehakkık olan Ümmügülsüm bt. Ahmed b. Abdullah nâm Hatun tarafından husûs-ı âtîde ikrâra vekîl olduğu zâtını ârifân Yusuf b. Abdullah ve Ali Beşe b. Halil şehâdetleriyle sâbit olan Selim b. Abdullah nâm kimesne meclis-i şer‘-i münîrde İstanbulî Ahmed b. Mehmed muvâcehesinde müvekkilem mezbûrenin akd-i âti’z-zikr sudûruna değin müstakilleten yedinde mülk ve hakkı olup zikr olunan mahzen derûnunda mevcûde beyne’l-esnâf gedik tâ‘bir olunan âlât-ı lâzıme-i ma‘lûmeyi tarefeynden icab ve kabûlü hâvi şürût-ı müfside ve muvâza‘adan âri bey-i bâtt-ı sahîh-i şer‘î ve safka-i vâhide ile mezbûr Ahmed’e bin üç yüz altmış guruşa bey‘ ve temlîk ve teslîm eylediğinde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm bin üç yüz altmış guruşu müşteri-i mezbûr müvekkilem merkūmeye def‘ ve teslîm ol dahi bi’t-tamam ahz u kabz edip fîmâ ba‘d gedik tâ‘bir olunan âlât-ı lâzıme-i mezkûre merkūm Ahmed’in mülk-i müşterâsı ve hakk-ı sırfı olup müvekkilem mezbûrenin kat‘â alâka ve medhali kalmamağla mebî‘-i mezkûrun tağrîr ve gabnine ve gedik husûsuna müte‘allika âmme-i de‘avîden her biri âharın zimmetini ibrâ ve iskāt ve her biri âharın ibrâsını kabûl eyledi deyü mukırr-ı vekîl-i merkūmun takrîr-i meşrûhunu mezbûr Ahmed tasdîk ettikden sonra gedik-i mezkûrun kaleminde kaydı merkūm Derviş Ağa üzerinden ref‘ ve terkīn ve mezbûr Ahmed üzerine kayd ve yedine sûret verilmek bâbında istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-23 min-Şevvâl sene [1]217