İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 482 Hüküm no: 567 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Elya ve Nikola’nın, malik oldukları francalacı ve peksimetçi fırınını Artin v. Nevirat’a sattıkları Galata’da francalacı ve peksimetçi fırını gediği mübâya‘ası Ma‘rûz Mahrûse-i Galata hısnı ebvâbından kireçkapısı dâhilinde Sultan Bayezid Mahallesinde vâki‘ bir bâb francalacı ve peksimetçi fırını derûnunda mevcûde gedik tâ‘bir olunan âlât-ı lâzıme-i ma‘lûmenin üç sehm i‘tibâriyle iki sehm-i şâyi‘ine tedâvül-i eyâdî ile bâ-hüccet mâlik olan francalacı Yani v. İlya ve bir sehm-i şâyi‘ine mâlik olan Nikola v. Mihal nâm zimmîler meclis-i şer‘-i münîrde habbâzân kethüdâsı Mustafa ve yiğitbaşı Süleyman ve bi’l-cümle nizâm ustaları ve uncular kethüdâsı es-Seyyid Mustafa ve yiğitbaşı Molla İbrahim vesâir mazbûtü’l-esâmî uncu tâifesi hâzır oldukları hâlde Artin v. Nevirat nâm zimmî muvâcehesinde biz ber-vech-i meşrûh mâlik olduğumuz francalacı ve peksimetçi fırını gediği tâ‘bir olunan âlât-ı lâzıme-i mezkûreyi tarefeynden bi’l-icâb ve’l-kabûl bâtten ve sahîhan mersûm Artin zimmîye dört bin iki yüz guruşa bey‘ ve temlîk ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabûl ettikden sonra semeni olan meblağ-ı mezbûrun bin yüz guruşunu emrimiz ile Hatice nâm Hatun’a verip ve mâ‘adâ üç bin yüz guruşu dahi beynimizde ma‘lûmü’l-vezn dakīk-i has semeninden zimmetimizde mesfûr Artin zimmîye bâ-temessük deynimiz olan üç bin yüz guruşa bi’t-terâzi takās ve mahsûb eyleyip ol vechile îfâ-yı deyn ve semen-i mezkûru istîfâ etmemizle mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘avîden her birimiz mersûm Artin zimmînin zimmetini kabûlü hâvi ibrâ-i âmm-ı sahîh-i şer‘î ile ibrâ ve iskāt eyledik fîmâ ba‘d gedik tâ‘bir olunan âlât-ı lâzıme-i mezkûrede bizim vechen mine’l-vücûh kat‘an alâka ve medhalimiz kalmayıp mesfûr Artin zimmînin mülk-i müşterâsı ve hakk-ı sırfı olmuşdur deyü mukırrân-ı zimmîyân-ı mersûmânın takrîr-i meşrûhlarını mesfûr Artin tasdîk etmeğin gedik-i mezkûrun başmuhâsebede olan kaydı mersûm Artin zimmî üzerine tahrîr ve kayd ve yedine sûret verilmek bâbında istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-21 min-L sene [1]217