İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 483 Hüküm no: 568 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in, sefîne semeninden kalan borcunu Tığlızâde Mustafa Ağa b. İsmail’e ödemesi gerektiği 837,5 guruş sefîne semeninden bâkī hüküm Ma‘rûz Sâhib-i arzuhâl hâssa hasekilerinden Tığlızâde Mustafa Ağa b. İsmail meclis-i şer‘-i münîrde derûn-ı arzuhâlde mezkûrü’l-ism el-Hâc Ali b. Mehmed mahzarında târih-i i‘lâmdan üç ay mukaddem Galata’da kalafat yeri nâm mahalde Mezbuta Şayika tâ‘bir olunur bir kıt‘a sefînenin nısfı benim ve nısf-ı âharı gāib ani’l-beled Ünyeli Hacı Said nâm kimesnenin yedimizde iştirâken mülkümüz iken şerîkim mezbûr Hacı Said nısf hissesini bundan akdem işbu merkūm el-Hâc Ali’ye bey‘ murâd eylediğini bana ifâde eyledikde ben dahi sefîne-i merkūmeden nısf hisse-i şâyi‘amı merkūm el-Hâc Said vesâtetiyle mezbûr el-Hâc Ali’ye bin dört yüz otuz yedi buçuk guruşa bey‘ ve temlîk ve teslîm eylediğimde ol dahi iştirâ ve temellük ve tesellüm ve kabûl eyledikden sonra semeni olan [84b] meblağ-ı mezbûrun altı yüz guruşunu bana edâ ve teslîm ve mâ‘adâ sekiz yüz otuz yedi buçuk guruşu hâlâ zimmetinde olmağla meblağ-ı bâkī-i merkūmu mezbûr el-Hâc Ali’den taleb ederim deyü ba‘de’d-da‘vâ ve’l-istintak merkūm el-Hâc Ali cevâbında kaziyye minvâl-i meşrûh üzere olduğunu bi-tamâmiha tâyi‘an ve kat‘an ikrâr u i‘tirâf etmeğin alâ-mûceb-i i‘tirâfihî meblağ-ı bâkī-i merkūm sekiz yüz otuz yedi buçuk guruşun müdde‘î-i mezbûr Mustafa Ağa’ya edâsıyla mezbûr el-Hâc Ali ilzâm olunduğu bi’l-iltimâs huzûr-ı âlîlerine i‘lâm olundu. Fî-27 min-Şevvâl sene [1]217