İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 483 Hüküm no: 569 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Takfur v. Hürmüz’ün, Kiragos v. Matos ile alacak davasında sulh oldukları 200 guruşa sulh Ma‘rûz Havâss-ı Refî‘a nevâhîsinden Hasköy’de mütemekkin derûn-ı arzuhâlde merkūmü’l-ism sarraf ve tütüncü Takfur v. Hürmüz nâm zimmî tarafından ber-vech-i âtî sulh ve ibrâya ve bedel-i sulhü kabza vekîl olduğu Hisarlı Osman Çavuş b. Hüseyin ile Kalpakçı Kirkor v. Kukas zimmî şehâdetleriyle sâbit olan Sarraf Serkiz v. Agob zimmî bi’t-terâzi meclis-i şer‘-i münîrde arzuhâl eden Kiragos v. Matos nâm zimmî muvâcehesinde müvekkilem mesfûr Takfur zimmînin mersûm Kiragos zimmetinde cihet-i karzdan bâ-i‘lâm-ı şer‘î mahkûmun-bih alacak hakkı olan iki yüz guruş mütâlebesinden mesfûr Kiragos zimmî ile bi’l-vekâle elli guruş bedel-i medfû‘ ve makbûza ba‘de akdi’l-musâlahati ve’l-kabûl mâ‘adâsı olan yüz elli guruşa ol dahi müvekkilem mersûmdan ma‘lûmü’l-vezn duhân semeni ve kayıcılık ücreti ve gerek tütüncülük ücretinden şirketleri müddeti olan yedi ayda fâide hâsıla hissesinden cem‘an mütâlebe eylediği altı yüz yetmiş beş guruşa ve hukūk-ı sâire-i şer‘iyyeye müte‘allika mutlakan âmme-i de‘avî ve kâffe-i mütâlebâtdan her birimiz bi’l-asâle ve bi’l-vekâle âharın zimmetini şürût-ı müfside ve uhûd-ı mübtileden âri ve cebr ve kerhden hâli ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i meşrûh âharın ibrâsını kabûl eyledik deyü ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-23 min-Şevvâl sene [1]217