İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 484 Hüküm no: 570 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mustafa Ağa b. Ali’nin, iltizam bedelininden borcunu Sarraf Agob v. Aleksan’a ödemesi gerektiği 1.200 guruş bedel-i iltizâm reddi edâya tenbîh Ma‘rûz Sâhib-i arzuhâl Sarraf Agob v. Aleksan nâm zimmî meclis-i şer‘-i münîrde Osman Ağa b. Ahmed hâzır olduğu hâlde Topkapı neferâtından derûn-ı arzuhâlde mezkûrü’l-ism Bostanî Mustafa Ağa b. Ali mahzarında mezbûr Mustafa sâbıkā has ahır hulefâsından Suğla sancağında Tümse karyesi ze‘âmetine mutasarrıf olan Hasan Ağa nâm kimesnenin yeğeni olmak takrîbiyle ze‘âmet-i mezkûreyi bin iki yüz on yedi senesi Martından Şubatı gāyetine gelince bir seneliğini hâzır-ı merkūm Osman Ağa ma‘rifetiyle mezbûr Mustafa bin iki yüz guruşa bana ilzâm ve bedel-i iltizâmı olan meblağ-ı mezbûr bin iki yüz guruşu nefsi için ber-vech-i peşin yedimden kabz ettikden sonra ze‘âmet-i mezkûre mutasarrıfı olan mezbûr Hasan Ağa kable’z-zabt bu esnâda fevt ve ze‘âmet-i merkūme âhara tevcîh olunmağla merkūm Mustafa’nın ber-vech-i meşrûh bedel-i iltizâm-ı mezkûr nâmıyla malımdan makbûzu olan meblağ-ı mezbûr bin iki yüz guruşu istirdâd murâdımdır deyü ba‘de’d-da‘vâ ve’l-istintak mezbûr Mustafa cevâbında kaziyye minvâl-i meşrûh üzere olduğunu bi-tamâmihî kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihî makbûzu olan meblağ-ı merkūm bin iki yüz guruşu müdde‘î-i mesfûr Agob zimmîye red ve teslîme mezbûr Mustafa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-25 min-Şevvâl sene [1]217