İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 485 Hüküm no: 571 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağyazer v. Avanes’in, değirmen ve etmekçi fırını kirasını Ümmügülsüm bt. Süleyman Ağa’ya ödemesi gerektiği 200 guruş fırın ve değirmen kirâsı hüküm Ma‘rûz Medîne-i Eyüb Yâvedûd nâm mahalde sâkine mu‘arrefetü’z-zât Ümmügülsüm Hanım bt. Süleyman Ağa meclis-i şer‘-i münîrde Ekmekçi Ağyazer v. Avanes zimmî muvâcehesinde Galata muzâfâtından Beşiktaş nahiyesine tâbi‘ Ortaköy’de iskele başında vâki‘ bi’l-îcâreteyn taht-ı tasarrufumda olan bir kıt‘a değirmen ve bir bâb etmekçi fırınımda şehriye kırk ikişer buçuk guruş kirâ ile mersûm Ağyazer zimmî müşâhereten müstecirim olup îcâre-i mezkûrenin mâh be-mâh ikişer buçuk guruşu değirmen ve fırın-ı mezkûrun îcâre-i müeccelesi için cânib-i vakfa vermek üzere sipariş ve havâle olunup mâ‘adâ kırkar guruşdan işbu târih-i i‘lâm senesi Cumâdelâhire gurresinden Şevvâli’l-mükerremi gāyetine gelince beş aylık mesfûrun zimmetinde müctemi‘ olan iki yüz guruşu mersûm Ağyazer zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr u i‘tirâf edip lâkin değirmen ve fırın-ı mezkûrlar bundan akdem ta‘mîre muhtâc olmağla müdde‘iye-i mezbûrenin emriyle malımdan üç yüz yedi guruş yirmi altı para harc ve sarfla zikr olunan değirmen ve fırının ba‘zı mevâzi‘ini ta‘mîr ve termîm etmemle masrûfum olan meblağ-ı mezbûru bi’l-mürâca‘a mezbûre Ümmügülsüm Hanım’dan taleb ederim deyü eylediği da‘vâsına ikāmet-i beyyineden ızhâr-ı acz edip talebiyle mezbûre Ümmügülsüm Hanım vech-i şer‘î üzere tahlîf olunmağın mûcebince mersûm Ağyazer zimmî da‘vâ-yı mezkûresiyle bilâ-beyyine mu‘ârazadan ba‘de’l-men zimmî-i mesfûrun sâlifü’l-beyân ikrârıyla lâzım gelen meblağ-ı mezbûr iki yüz guruşu müdde‘iye-i mezbûre Ümmügülsüm Hatun’a edâsıyla mersûm Ağyazer zimmî ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-27 Şevvâl sene [1]217