İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 485 Hüküm no: 572 Orijinal metin no: [84b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in, Mustafa b. Mehmed aleyhine açtığı eşya ve akçe davasında iddiasını ispat edemediğinden muarazadan men edildiği Eşyâ ve akçe da‘vâsı men‘i Ma‘rûz Peştemâlci Hânı ahâlîsinden el-Hâc Hüseyin b. Mehmed İstanbul Bâb Mahkemesinde meclis-i şer‘de Mustafa b. Mehmed nâm kimesne mahzarında bundan akdem vâki‘ olan iplikçi Hânı harîkinde eşyâ-i memlûkemden ihrâc eylediğim dört guruş kıymetli bir sepet sandık derûnunda mevzû‘ yüz altmış guruş kıymetli eşyâm ile nakden iki yüz doksan beş guruşum olup ve otuz beş guruş kıtmetli bir eyer ma‘a takımı [85a] Parmakkapı civârında eskici dükkânı önünde tarîk-i âmda mezbûr Mustafa’ya mülâki olduğumda ol dahi mahâll-i merkūmda kendi eşyâsını vaz‘ edip muhâfız üzere iken bana sen dahi bu mahalle eşyâlarını vaz‘ eyle muhâfaza ederim demekle ben dahi mahâll-i mezbûrda eşyâlarımı mezbûr Mustafa’nın eşyâlarını yanına vaz‘ ve teslîm edip ba‘dehû mezbûr Mustafa kendi eşyâsıyla ma‘an benim sâlifü’z-zikr sandığım ile eyerim ahz etmekle suâl olunup eşyâ-i muharrere-i mezkûre mevcûde ise ayânını müstehlike ise ba‘de’s-sübût kıymet-i şer‘iyyelerini mezbûr Mustafa’dan taleb ederim deyü da‘vâ ol dahi külliyen ba‘de’l-inkâr müdde‘î-i merkūm ber-vech-i muharrer müdde‘âsına ikāmet-i beyyine edemeyip bi’t-taleb mezbûr Mustafa muvâcehesinde ber-nehc-i şer‘î tahlîf olunmağın mûcebince müdde‘î-i mezbûr da‘vâ-yı mezkûresiyle mezbûr Mustafa’ya bilâ-beyyinetin âdile bî-vech-i şer‘î mu‘ârazadan men‘ olunduğu mübâşirleri kapı kethüdâsı İbrahim Beşe iltimâsıyla huzûr-ı âlîlerine i‘lâm olundu. Fî-28 min-Şevvâl sene [1]217