İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 486 Hüküm no: 573 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Emine bt. Abdullah’ın, kocası İsmail b. Yusuf’tan muhâlaa yoluyla boşandığı İsbât-ı hul‘ Ma‘rûz Derviş İsmail b. Yusuf İstanbul Bâb Mahkemesinde meclis-i şer‘de mu‘arrefetü’z-zât Zenciye Emine bt. Abdullah mahzarında mezbûre Zenciye Emine yirmi beş guruş mehr-i müeccel tesmiyesiyle zevce-i medhûlün-bihâm olup bana itâ‘at ve inkıyâd etmemekle suâl olunup bana itâ‘ate mezbûre Zenciye Emine’ye tenbîh olunmak matlûbumdur deyü da‘vâ eyledikde ol dahi cevâbında müdde‘î-i mezbûr zevc-i dâhili olduğunu ikrâr lâkin târih-i i‘lâmdan üç sene mukaddem medîne-i Üsküdar’da İhsaniye Mahallesinde huzûr-ı Müslimînde zimmetinde mütekarrir ve ma‘kūdun aleyh olan meblağ-ı mezbûr yirmi beş guruş mehr-i müeccelim üzerine muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru kabûl etmişdi deyü eylediği def‘ini makbuli’ş-şehâde idükleri ihbâr olunan Hayreddin Ağa b. el-Hâc Ömer nâm kimesneler ile Fâtıma bt. Hüseyin ve Hatice bt. Abdullah şehâdetleriyle muvâcehesinde isbât etmeğin mûcebince müdde‘î-i merkūm Derviş İsmail zevciyet da‘vâsıyla mezbûre Zenciye Emine’ye tâ‘bir bi-gayr-ı vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî-28 min-L sene [1]217