İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 487 Hüküm no: 574 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli bir bab kasap dükkânı gediğinin Seyyid Mustafa b. Hasan’ın vefâtıyla, Seyyid İbrahim ve Seyyid Ahmed’e devredildiği Yenicâmi’de kasab gediği mübâya‘a Ma‘rûz Hüdâvendigâr-ı sâbık cennet-mekân firdevs-âşiyân Sultan Abdülhamid Hân aleyhi’r-rahmeti ve’l-Gufrân evkāf-ı şerîfesi mülhakātından Yedikule hâricinde kâin on aded ganem selhhânelerinden birinci selhhâneye merbût kasab dükkânlarından İstanbul’da Yenicâmi havlusunda vâki‘ bir bâb kasab dükkânı derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmeye vakf-ı müşârun-ileyh mütevellîsi temessüküyle mutasarrıf olan kasab ustalarından es-Seyyid Mustafa b. el-Hâc Hasan bilâ-veled fevt olup gedik-i mezkûr cânib-i vakfa aid olduğu ihbâr olunmağla âlât-ı lâzıme-i mezkûreyi ber-vech-i âtî istîcâra tâlibler kasab esnâfından istihkākları nümâyân olan bâ‘isü’l-i‘lâm kendi nefsinden asîl ve es-Seyyid Ahmed b. Hüseyin b. Ahmed nâm kimesne tarafından husûs-ı âtîde vekîl olduğu Kethüdâ İsmail b. Mehmed ve Halil b. Ömer şehâdetleriyle sâbit olan es-Seyyid İbrahim b. es-Seyyid Ali meclis-i şer‘-i münîrde ekliletü’l-muhassanât tâcu’l-mestûrât zâtü’l-aliyy ve’s-sa‘adât Devletlü İsmetlü Vâlide Sultan aleyhi’ş-şân hazretlerinin kethüdâ-yı vâlaşânları ve vakf-ı müşârun-ileyhin kāimmakām-ı mütevellîsi Semahatlü Atûfetlü Yusuf Ağa hazretleri taraflarından umûr-ı vakfı rü’yete vekîl-i müsecceli Halil Efendi b. Ahmed mahzarında hâssa kasabbaşısı İzzetlü Mustafa Ağa tarafından mürsel kethüdâ-yı merkūm İsmail vesâir mazbûtü’l-esâmî kasab ustaları hâzır oldukları hâlde bi’l-asâle ve bi’l-vekâle takrîr-i kelâm edip kāimmakām-ı mütevellî-i mûmâ-ileyh taraflarından umûr-ı vakfı rü’yete vekîl-i müsecceli mezbûr Halil Efendi gedik tâ‘bir olunan âlât-ı lâzıme-i mezkûreyi müteveffâ-i merkūmun mahlûlünden sûk-ı Sultanîde ba‘de’l-müzâyede ve inkita‘ı’r-rağbe el-yevm mu‘accele-i mümâsili olduğu bi’l-ihbâr mütehakkık olan sekiz yüz guruş mu‘accele ile taraf-ı vakf-ı müşârun-ileyhden kāimmakāmlığı hasebiyle benimle müvekkilim mezbûr es-Seyyid Ahmed’e ale’l-iştirâki’s-seviyy îcâr ve teslîm etmeleriyle biz dahi ber-vech-i muharrer ma‘an istîcâr ve tesellüm ve kabûl ve mu‘accele-i merkūm sekiz yüz guruşu taraf-ı vakf için vekîl-i mezbûra teslîm ve umûr-ı vakf-ı müşârun-ileyhe sarfla istihlâke emr etmemizle ol dahi kabz ve umûr-ı vakfa sarfla ba‘de’l-istihlâk mu‘accele-i müstehleke-i merkūmenin adem-i istîfâsına ve bi’l-cümle husûs-ı merkūma müte‘allika âmme-i de‘avîden taraf-ı vakfı ve kāimmakām-ı mütevellî-i mûmâ-ileyh ile vekîl-i mezbûrun zimmetlerini kabûlü hâvi bi’l-asâle ve bi’l-vekâle ibrâ ve iskāt eyledim dediğini kāimmakām-ı mütevellî vekîl-i mezbûr tasdîk etmeğin sâlifü’l-beyân gedik tâ‘bir olunan âlât-ı lâzıme-i müteveffâ-i merkūmun mahlûlünden vech-i meşrûh üzere merkūmân es-Seyyid İbrahim ve es-Seyyid Ahmed’e ale’l-iştirâki’s-seviyy îcâr olunduğunu müş‘ir bi’l-münâsafa zabt ve tasarrufları için taraf-ı vakf-ı müşârun-ileyhden temessük i‘tâ buyrulmak bâbında istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-23 min-Şevvâl sene [1]217