İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 494 Hüküm no: 581 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostanî Mustafa b. Yakub’un, kefilliğinden dolayı Niğdeli Papas oğlu Saya aleyhine açtığı alacak davasında muarazadan men edildiği İltizâm bedeline kefâlet şer‘an sahîha olmayıp mu‘ârazadan men‘ Ma‘rûz İstanbul’da Ahırkapı kurbünde Sarrachâne-i Âmire ocağından sâhib-i arzuhâl Bostanî es-Seyyid Mustafa b. es-Seyyid Yakub meclis-i şer‘-i münîrde derûn-ı arzuhâlde merkūmü’l-ism Niğdeli Papas oğlu Saya v. Kaliknos nâm zimmî muvâcehesinde bin iki yüz on beş senesi Zilhiccenin on beşinci günü bâ-berât-ı âlişân mutasarrıf olduğum vilâyet-i Anadolu’da Bor kazâsında Kayı nâm karyeden nısf-ı mâlikâne hissemi altı yüz guruş bedel-i mukāvelesiyle gāib ani’l-beled Niğdeli Ferikoğlu es-Seyyid İbrahim nâm kimesneye hüsn-i rızâmla kasr-ı yed etmemle nısf-ı mâlikâne-i merkūme kasr-ı yedimden mezbûr es-Seyyid İbrahim’e tevcîh ve berât olundukdan sonra ber-vech-i meşrûh mukāvele eylediğimiz kasr-ı yed bedeli olan meblağ-ı mezbûr altı yüz guruş bana deyni olmak zu‘muyla merkūm es-Seyyid İbrahim karz unvânıyla bir kıt‘a temessükü yedime i‘tâ ve meblağ-ı mezbûra mesfûr Saye zimmî kefîl olup kefâletini müş‘ir hâmiş-i temessük-ı mezkûra tahrîr ve temhîr edip meblağ-ı mekfûlün-bih-i merkūmun on beş guruşunu zimmî-i mersûmdan ahz etmemle bâkīsi olan beş yüz seksen beş guruşu kefâlet-i mezkûresine binâen taleb ederim deyü da‘vâ ettikde müdde‘î-i mezbûr es-Seyyid Mustafa’nın takrîr-i meşrûhu üzere meblağ-ı mekfûlün-bih mezkûr nısf mâlikâne merkūme kasr-ı yed bedeli olup düyûn-ı sahîhadan olmamağla bedel-i merkūma kefâlet dahi şer‘an sahîha olmadığı müdde‘î-i mezbûra tefhîm ve kefâlet-i mezkûreye binâen meblağ-ı bâkī-i mezbûr mütala‘asıyla zimmî-i mesfûra bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-2 Zilka‘de sene [1]217