İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 494 Hüküm no: 582 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mahmud’un berber dükkânında kiracısı olan Seyyid Mustafa’yı haksız yere çıkartamayacağı Berber dükkânından müstecirîni ihrâca tasaddîleri men‘ Ma‘rûz Nezâret-i hazret-i Şeyhülislâm sellemehü’s-selâmda âsûde evkāfdan merhûm Paylak Mustafa Paşa vakfı musakkafâtından Galata’da Azebkapısı hâricinde kolluk kurbünde vâki‘ bir bâb kemer berber dükkânının bi’l-îcâreteyn mutasarrıfı derûn-ı arzuhâlde mezkûrü’l-ism kayık yapıcı el-Hâc Mehmed b. Mahmud nâm kimesne sâdır olan fermân-ı âlîlerine imtisâlen evkāf-ı mezbûre müfettişi mevâlî-i izâmdan Debbâğzâde Faziletlü Numan Efendi ma‘iyetiyle du‘âhâne-i dâ‘îlerinde ma‘kūd meclis-i şer‘-i münîrde dükkân-ı mezkûrda müstecir ve derûnunda mevcûde olup hâmiş-i arzuhâlde mastûr derkenâr nâtık olduğu üzere başmuhâsebede mukayyed mu‘teber gediklerden olmak üzere berber âlât-ı lâzıme-i ma‘lûmesinin tedâvül-i eyâdî ile bâ-hüccet mâliki olan es-Seyyid el-Hâc Mustafa b. es-Seyyid el-Hâc Ahmed mahzarında berber esnâfından es-Seyyid Ali b. es-Seyyid Mehmed hâzır olduğu hâlde mezbûr es-Seyyid el-Hâc Mustafa ve mukaddemâ dahi hâzır-ı merkūm Ali ber-vech-i muharrer bi’l-îcâreteyn taht-ı tasarrufumda olan dükkân-ı mezkûrda ecr-i misline mu‘âdil olarak îcâre-i kadîmesi olan beher şehr doksanar para îcâre ile müstecirlerim olup îcâre-i mezkûresini mâh be-mâh müstecir-i mezbûrun edâda cevr ve ezâsı olmayıp lâkin dükkân-ı merkūm derûnunda fevkānî musundıra tâ‘bir olunan sagīr oda misillü bîkâr beytûtet edecek bir mahal olmağla şehriye îcâre-i mezkûresine ikişer guruş dahi zam eylesin yâhud dükkân-ı mezbûrda berberlik etmesine râzı olmam âhar san‘at erbâbına îcâr ve iskân murâd etmemle dükkân-ı merkūmdan hurûca mezbûr es-Seyyid el-Hâc Mustafa’ya tenbîh olunmak matlûbumdur dedikde merkūm es-Seyyid Mustafa cevâbında hâmiş-i arzuhâlde mastûr başmuhâsebeden kaydı derkenâr olunan bir kıt‘a emr-i âlîşân ve memhûr sûret-i defter-i müfredât mantûklarınca zikr olunan Galata’da Azebkapısı hâricinde kolluk kurbünde Berber Ahmed gediği demekle mukayyed olunan dükkân-ı mezkûrun gediği tedâvül-i eyâdî ile bâ-hüccet benim tasarrufumda olup ve sâlifü’l-beyân Galata ve tevâbi‘inde vâki‘ berberân gedikleri ashâbı dekâkîn sâhiblerine mâh be-mâh îcâre-i kadîmelerini tamamen edâ ederler iken kanâ‘at etmeyip tama‘-ı hâmından nâşî günâgûn bahâne ile ihrâca tasaddîleri memnû‘ ve nizâm-ı kadîmimiz vech-i muharrer üzere câri olagelmekle müsin ve ihtiyâr ustalarımızdan istihbâr olunsun dedikde esnâf-ı merkūmenin mazbûtü’l-esâmî ustalarından ba‘de’l-istintak fi’l-hakīka dükkân-ı mezkûrun gediği tedâvül-i eyâdî ile bâ-hüccet merkūm es-Seyyid el-Hâc Mustafa’nın tasarrufunda olup başmuhâsebeden verilen memhûr sûret-i defterde dâhil gediklerden olup ve berberân gedikleri ashâbı dekâkîn sâhiblerine îcâre-i kadîmesini mâh be-mâh edâda cevr ve ezaları yok iken mücerred tama‘-ı hâmlarından nâşî gûnâ-gûn bahâne ve ızrâr kasdıyla bî-vech ihrâca tasaddîleri bâ-fermân-ı âlî memnû‘ [87a] olup merkūm el-Hâc Mehmed işbu merkūm es-Seyyid el-Hâc Mustafa’yı muğâyir-i emr-i âlî ihrâc-birle âhar kimesneyi dükkân-ı mezkûra iskân irâdesiyle ihtilâl-i nizâmı mûceb harekete tasaddî eder deyü ihbâr ve mazmûnu min-külli’l-vücûh takrîr-i meşrûhlarına mutâbık ibrâz eyledikleri tuğralı emr-i âlînin mazmûnunu mezbûr el-Hâc Mehmed mukırr ve mu‘terif olmağla hilâf-ı fermân-ı âlî mücerred kirâ artırmak dâ‘îyesiyle bî-vech ihrâc ve ihtilâl-i nizâmı mûceb harekete tasaddî ile mugāyir-i emr-i âlî rencîde ve mu‘ârazadan merkūm el-Hâc Mehmed men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-25 min-Şevvâl sene [1]217