İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 497 Hüküm no: 584 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan b. Mehmed ile Pirinççi Ali b. Halil’in zenbil semeni ve mahzen kirası davalarında birbirlerinin zimmetlerini ibrâ ettikleri Zenbil semeni ve mahzen kirâsı da‘vâlarından birbirlerini ibrâ Ma‘rûz Sâhib-i arzuhâl Küfeci es-Seyyid Hasan b. es-Seyyid Mehmed nâm kimesne meclis-i şer‘-i münîrde derûn-ı arzuhâlde mezkûrü’l-ism Pirinççi Ali b. Halil mahzarında ben işbu târih-i i‘lâma gelince on üç sene müddetde malımdan âhara bey için mezbûr Ali’ye verdiğim diğer dokuz bin üç yüz altmış aded pirinç zenbillerimi beheri yirmişer paraya olmak üzere âhara bey‘ ve semenleri olan cem‘an dört bin altı yüz seksen guruşu kabz etmekle makbûzu olan meblağ-ı merkūmun iki bin beş yüz guruşu müddet-i mezkûrede mezbûrun mahzenine beher pirinç zenbiline onar para ücret-i arziye mukāvelesiyle vaz‘ eylediğim on bin zenbil-i arzıyyesine takās ve mahsûb olunmağla bâkīsi olan iki bin yüz seksen guruşu mezbûr Ali’den taleb ve da‘vâ eylediğimde ol dahi müdde‘âmı külliyen inkârından mâ‘adâ benim senin zimmetinde ma‘lûmü’l-keyl pirinç ve dakīk-i has semenlerinden cem‘an bâ-temessük üç yüz otuz iki guruş otuz altı para alacağım vardır deyü benden da‘vâya tasaddî ve ol vechile beynimizde ba‘de vukū‘ı’l-münâza‘a bâ-vesâtet-ı muslihîn her birimiz âhardan tasaddî eylediğimiz da‘vâ-yı mezkûrelerimizden bi’t-tav‘ ve’r-rızâ meccânen fâriğler olup bi’l-cümle zikr olunan husûslara ve târih-i i‘lâma gelince beynimizde cereyân eden sâir hukūk-ı şer‘iyyeye müte‘allika mutlakan âmme-i de‘âvî ve kâffe-i mütâlebâtdan benim mezbûr Ali zimmetinde onun dahi benim zimmetimde kat‘an hakkımız ve alacağımız kalmamak ma‘nâsına şürût-ı müfside ve uhûd-ı mübtileden âri ve cebr ve kerhden hâli ibrâ-yı âmm-ı sahîh-i şer‘î ile kabûlü hâvi her birimiz ibrâ ve iskāt eyledik deyü ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-5 min-Zilka‘de sene [1]217