İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 498 Hüküm no: 585 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a Mısır’dan getirilen kahvenin dağıtımı Kahve tevzî‘i Ma‘rûz Âsitâne-i aliyyeye Mısır cânibinden kahve getiren tüccârın altı aydan beri getirdikleri kahveleri hânlarda ve mahzenlerde mevcûd olup tedricle füruhtu müte‘assir ve navl-ı sefînelerini dahi edâya adem-i iktidârları nümâyân olmağla tüccârın sermâyelerine sekte gelmemek için mevcûd olan kahveleri esnâfa tevzî‘ olunmak bâbında sâdır olan fermân-ı âlîlerine imtisâlen cânib-i şer‘den mürsel Başkâtib Ahmed Efendi ve gümrük emîni ağa taraflarından mürsel çukadâr kulları Mısır tüccârının ve attârânın kethüdâ ve müsinn-i ihtiyârları ma‘rifetleriyle kadîmden beri kahve vaz‘ olunan Papaszâde ve Sepet hânları ile Haraççı ve Ağa hânlarında ve mahâll-i müte‘addidede kâin sâir hânlar ve mahzenlerde tüccârın malı olup ashâbı mevcûd olmamağla ibkā olunan ketencilerde yirmi üç ferde ve Haraçcı hânında dört ferde ile on aded siyah çuval kahveden mâ‘adâ mevcûd olan bin dört yüz yirmi sekiz ferde kahvelerini işbu sene-i mübâreke Şevvâlinin yirmi birinci gününden altmış bir gün va‘desiyle beher kıyyesini üçer buçuk guruşa olmak üzere attârâna tarefeynin rızâlarıyla tevzî‘ eyledikleri kahve iki yük kırk beş bin altı yüz on altı vakıyyeye bâliğ oldukda mârru’z--zikr toz kahvenin beher yirmi beş dirhemini on ikişer para olarak târih-i mezbûrdan yüz yirmi beş gün tamamına değin ibâdullâhı idâre etmek üzere attârân esnâfı ta‘ahhüd edip lâkin kable tamami’l-müdde kahvenin fiyatına noksan terettüb ederse zikr olan kahveciler haserât-ı azîmeye giriftâr olacağımız âşikârdır deyü istirhâmları ve müddet-i mezkûre hitâmına değin vech-i meşrûh üzere ibâdullâha bey‘e müte‘ahhid oldukları ma‘lûm-ı devlet-i âsafâneleri buyruldukda ol bâbda emr u fermân hazret-i veliyyü’l-emrindir. Fî-5 min-Zilka‘de sene [1]217