İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 500 Hüküm no: 587 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in Tarakçılar’daki bir bab kahve dükkânı gediğinin nısf hisesini Mustafa b. Ali’ye sattığı Tarakçılar içinde kahve gediğinin nısf hisse-i mübâya‘ası 875 guruşa Ma‘rûz Sâhibe-i arzuhâl Çınarcıklı Fâtıma bt. Mehmed b. Süleyman nâm hatun tarafından ber-vech-i âtî ferağ ve ibrâya vekîl olduğu zâtını ârifân Hasan Efendi b. Mehmed Emin ve es-Seyyid Ahmed Beşe b. Hüseyin şehâdetleriyle sâbit olan Halil Efendi b. Mehmed meclis-i şer‘-i münîrde derûn-ı arzuhâlde mezkûrü’l-ism Mustafa b. Ali mahzarında merkūme Dâye Hatun Vakfı’nın kāimmakām-ı mütevellîsi Kağıtçı el-Hâc Mehmed b. Abdullah hâzır olduğu hâlde vakf-ı mezbûr musakkafâtından İstanbul’da Tarakçılar içinde kâin ma‘lûmü’l-hudûd bir bâb kahve dükkânının nısf-ı şâyi‘i müvekkilem mezbûre Fâtıma Hatun’un ve nısf-ı şâyi‘-ı âharı merkūm Mustafa’nın bâ-temessük-ı mütevellî bi’l-îcâreteyn taht-ı tasarruflarında [88a] olup dükkân-ı mezkûr derûnunda mevcûde beyne’l-hıref gedik tâ‘bir olunan âlât-ı lâzıme-i ma‘lûmenin dahi nısfı merkūm Mustafa’nın ve nısf-ı âharı işbu hâzır bi’l-meclis Hüseyin Beşe b. Mehmed nâm kimesnenin bâ-hüccet-i şer‘iyye iştirâken yedlerinde mülkleri olmağla hâlâ ben müvekkile-i mezbûre Fâtıma Hatun’un dükkân-ı mezkûrdan bâ-temessük-ı mütevellî mutasarrıfe olduğu nısf hisse-i şâyi‘asını sekiz yüz yetmiş beş guruş bedel mukābelesinde bi’l-vekâle bâ-re’y-i kāimmakām-ı mütevellî merkūm Mustafa’ya ferağ-ı kat‘î-i mu‘teber ile ferağ ve tefvîz eylediğimde ol dahi ber-vech-i muharrer tefevvüz ve kabûl edip bedel-i merkūm sekiz yüz yetmiş beş guruşu bi’l-vekâle kabz ve müvekkilem mezbûreye teslîm ol dahi ahz u istihlâk edip ba‘de’l-yevm dükkân-ı mezkûrda ve gediğinde müvekkilem mezbûrenin kat‘an alâka ve medhali kalmayıp mezbûr Mustafa’nın dâhil-i havza-i tasarrufu olmağla ben bi’l-vekâle dükkân-ı mezkûra ve gediğine merkūm Mustafa dahi bedel-i ferağ nâmıyla medfû‘ olan meblağ-ı müstehlek-i merkūmun adem-i istîfâsına ve bi’l-cümle zikr olunan husûslara müte‘allika âmme-i de‘avîden her birimiz âharın zimmetini bi’l-asâle ve bi’l-vekâle ibrâ-i âmm-ı sahîh-i şer‘î ile kabûlü hâvi ibrâ ve iskāt eyledik deyü ba‘de’l-ikrâr ve’t-tasdîk kāimmakām-ı mütevellî hâzır-ı mezbûr dahi nısf dükkân-ı mezkûra müvekkile-i merkūmenin ferağından merkūm Mustafa’nın tasarrufunu re’y eylediği İstanbul mahkemesinde tescîl ve huzûr-ı âlîlerine i‘lâm olundu. Fî-3 min-Zilka‘de sene [1]217