İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 501 Hüküm no: 588 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Salih Beşe b. Mehmed, eşi Hamide ve kızı Emine’nin kötü halleri sebebiyle mahalleden çıkarılmaları Mahalleden ihrâc Ma‘rûz İstanbul’da Fatih Sultan Mehmed Hân Câmi‘-i şerîfi kurbünde Kirmasti Mahallesi İmâmı Mehmed Salih Efendi ve Müezzin Molla İsmail ve ahâlîsinden Hâfız Mehmed Efendi ve Hasan Ağa ve Ahmed Efendi ve es-Seyyid Mustafa Efendi ve es-Seyyid Mehmed Tahir Efendi ve Ahmed Ağa ve es-Seyyid Memiş Ağa ve Hâfız Ahmed Efendi ve Habîb Ağa vesâir cema‘at-i Müslimîn meclis-i şer‘-i münîrde mahalle-i mezbûre sâkinlerinden manav ve es-Seyyid Mehmed Salih Beşe b. Mehmed muvâcehesinde mezbûr es-Seyyid Mehmed Salih Beşe ve zevcesi Hamide ve kızı Emine Hatunlar mahallemiz sükkânından olup lâkin kendi hallerinde ırzıyla mukayyedler olmayıp mechûletü’l-ahvâl ricâli menziline idhâl ve fuhşiyâta dâir ef‘âl-i şenî‘aya irtikâba ictisâr etmeleriyle bi’d-defa‘ât kendilere tenbîh olundukda kat‘an mütenebbihler olmayıp mütecâsir oldukları harekât-ı nâ-marziyyelerinde ısrâr üzere olup hatta iki gece mukaddem menzili kapısı tepelenip ol vechile mezbûrûndan bi’l-külliye emn ve rahatımız meslûb olmuşdur deyü iştikâ ve merkūm Mehmed Salih Beşe muvâcehesinde sû-i hâllerini ihbâr ve mahalle-i merkūmeden hurûclarını cümlesi bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-7 min-Zilka‘de sene [1]217