İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 502 Hüküm no: 590 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes’in, Süleyman Efendi b. Ahmed’e olan borcunu kefaletinden dolayı Artin’in ödemesi gerektiği 5.780 guruş kefâletine binâen hüküm Ma‘rûz Koru ağasızâde es-Seyyid Süleyman Efendi b. Ahmed meclis-i şer‘-i münîrde habbâzân kethüdâsı Mustafa hâzır olduğu hâlde İstanbul’da Şehremini nâm mahalde Vâlide Sultan fırını nâm-ı diğer fırının ustası Avanes v. Kazer nâm zimmînin oğlu Artin zimmî muvâcehesinde mersûm Artin’in babası mesfûr Avanes zimmî târih-i i‘lâmdan dokuz ay mukaddem ber-vech-i âtî malımdan ve yedimden iktirâz ve kabz edeceği beş bin yüz elli guruş mukābelesinde fırın-ı mezkûra merbût mütemekkin olduğu on horoslu bir bâb değirmen derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin kırk sehm i‘tibâriyle yirmi üç buçuk sehm-i şâyi‘ini kethüdâ ve nizâm ustaları ma‘rifetleriyle bana rehn ve vech-i lâyıkı üzere teslîm ben dahi irtihân ve kabz eylediğimden sonra malımdan ber-vech-i muharrer beş bin yüz elli guruş zimmî-i mesfûra ikrâz ve teslîm ol dahi iktirâz ve kabz edip semeni târih-i merkūmdan beher sene tamamına değin müeccel ve mev‘ûd olmak üzere yine malımdan ve yedimden iştirâ ve kabz eylediği bir semmur kürk semeni olan sekiz yüz kırk guruşdan işbu târih-i i‘lâma gelince dokuz ayda müstehak olduğum altı yüz otuz guruş ki cem‘an beş bin yedi yüz seksen guruş hakkıma oğlu mersûm Artin zimmî tarafından bi’l-emr ve’l-kabûl kefâlet-i mutlaka-yı sahîha ile kefîl ve zâmin olmağla meblağ-ı mecmû‘-ı merkūm mesfûr Artin zimmîden kefâletine binâen hâlâ taleb ederim deyü da‘vâ ettikde ol dahi kaziyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin alâ-mûceb-i i‘tirâfihi meblağ-ı mecmû‘-ı merkūm beş bin yedi yüz seksen guruşu müdde‘î-i mezbûr es-Seyyid Süleyman Efendi’ye bi-hükmi’l-kefâle edâsıyla mesfûr Artin zimmî ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-15 Şa‘ban sene [1]217