İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 503 Hüküm no: 591 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hanım bt. Mustafa’nın, yorgancı Mustafa b. Mehmed’e olan borcunu taksitle ödeyeceği Beher mâh 15 guruşa te’cîl Ma‘rûz Yorgancı el-Hâc Mustafa b. Mehmed meclis-i şer‘-i münîrde Hâcegân-ı Dîvân-ı Hümâyûndan müteveffâ İsmail İsmetî Efendi zevcesi demekle arîfe ve zâtı ta‘rîf-i şer‘î ile mu‘arrefe olan Emetullah Hanım bt. Mustafa Efendi muvâcehesinde sadriye-i kebîre kerîmesi mu‘arrefetü’z-zât Hibetullah Hanım bt. el-merhûm el-mezbûr İsmail İsmetî Efendi hâzıra olduğu hâlde mezbûre Emetullah Hanım zimmetinde bin iki yüz on beş senesi Rebî‘ülâhirinde malımdan ve yedimden iştirâ ve kabz ve istihlâk eylediği bâ-feter-i müfredât yorgancı metâ‘ı semenlerinden alacak hakkım olan bin sekiz yüz elli guruşun bin iki yüz otuz guruşunu târih-i mezbûrdan beri ceste ceste bana edâ ve teslîm ve mâ‘adâ altı yüz guruşu hâlâ zimmetinde olmağla taleb ederim deyü da‘vâ eylediğimde ol dahi ber-vech-i muharrer müdde‘âmı bi-tamâmihî tâyi‘aten ve kat‘iyyen ikrâr u i‘tirâf ve meblağ-ı bâkī-i mezkûrun elli guruşunu dahi işbu meclis-i şer‘de bana def‘ ve teslîm edip mâ‘adâsı olan beş yüz yetmiş guruşu hâlen ve def‘aten edâya iktidârım yokdur deyü ber-vech-i âtî benden istimhâl etmekle ben dahi târih-i i‘lâmdan beher şehr hitâmında bana on beşer guruş verip ol vechile otuz sekiz ay tamamına değin meblağ-ı merkūmu muksitan edâ ve îfâ etmek üzere dâniyem mezbûre Emetullah Hanım’ı rızâmla imhâl ve te’cîl eylediğimde ol dahi ber-vech-i meşrûh üzere muksitan ve müeccelen edâya müte‘ahhide oldukdan sonra kerîmesi hâzıra-i mezbûre Hibetullah Hanım dahi vâlidesi mezbûrenin bana deyni olan meblağ-ı müeccel-i bâkī-i mezbûra tarefeynden bi’l-emr ve’l-kabûl kefâlet-i mutlaka-yı sahîha-i şer‘iyye ile kefîl ve zâmine olup ve mezbûre Hibetullah Hanım’ın malı olmak üzere yedimde vedî‘a olan bir çekmece sa‘atimi ma‘rifet-i şer‘le teslîm ol dahi ahz u kabz eyledi deyü mezbûr el-Hâc Mustafa’nın sâdır olan bi’l-cümle takrîr-i meşrûhunu mezbûre Emetullah Hanım ile kerîmesi hâzıra-i mezbûre Hibetullah Hanım’dan her biri tasdîk eylediği İstanbul Mahkemesi’nde tescîl ve huzûr-ı âlîlerine i‘lâm olundu. Fî-5 min-Zilka‘de sene [1]217