İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 504 Hüküm no: 592 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah’ın Attar esnaflığından çıkarılması Attâr esnâfından ihrâc Ma‘rûz Âsitâne-i aliyye ve tevâbi‘i olan bilâd-ı selâsede vâki‘ attârân esnâfının bâ-berât-ı âlişân kethüdâsı Ömer Ağa ve yiğitbaşı el-Hâc Abdullah ve Mısırçarşısı attârlarından Mehmed Ağa ve el-Hâc Hasan <> ve es-Seyyid el-Hâc Ahmed ve el-Hâc Hüseyin ve Halil Efendi ve es-Seyyid Lütfullah Efendi ve Molla Mustafa vesâirleri meclis-i şer‘-i münîrde es-Seyyid el-Hâc Hâfız Abdullah b. es-Seyyid Abdullah muvâcehesinde mezbûr es-Seyyid el-Hâc Hâfız Abdullah bir iki seneden beri mârru’z--zikr Mısırçarşısı’nda Helvacı kapısının sol tarafında ikinci dükkânda sâkin attâr olup lâkin bâ-fermân-ı âlî tevzî‘ine memûr olduğum attâr emti‘asından mezbûr es-Seyyid el-Hâc Hâfız Abdullah hissesini alıp dükkânına vaz‘ ve âhara bey‘ edip akçesini vakit ve zamânıyla tüccâra edâ etmeyip kendisi ekl [ve] bel‘ ve itlâf edip tüccâr dahi verdikleri mallarını mütâlebe ettiklerinde mal-ı tüccârı ekl ve bel‘ kasdıyla hîleye sülûk ile ba‘zısını inkâr ve ba‘zısını dahi edâda ta‘allül ve muhâlefet ve ol vechile tüccâra hasâreti mûceb harekâta tasaddî eylemesi cümlemizin i‘tibârına halel târi olmasına bâ‘is ve tüccârın esnâfımıza i‘timâdının meslûbiyetine bâdi olup dâimâ beynlerinde münâza‘a ve müşâcereden hâli olmamağla bi’d-defa‘ât lonca tâ‘bir olunur cem‘iyetimize da‘vet ve kendiye nush u pend olundukda kat‘an mütenebbih olmayıp ızrârdan ısrâr üzere olduğundan mâ‘adâ müzevvir da‘vâlara vekâlet ve şehâdet etmek dahi âdet-i müstemirresi olmağla mezbûrun bu makūle harekât-ı nâ-marziyesinden cümlemizin emn ve rahatımız meslûb olmuşdur deyü iştikâ ve sû-i hâlini muvâcehesinde ihbâr ve fîmâ ba‘d esnâf-ı merkūmeye duhûl etmeyip kesb-i âhara şürû‘ etmek üzere mezbûr es-Seyyid Hâfız Abdullah’ın esnâf-ı merkūmeden ihrâc olunmasını bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-7 min Za sene [1]217