İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 505 Hüküm no: 594 Orijinal metin no: [88b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Abdullah b. Abdullah’ın, Attar Molla Mustafa b. Mehmed’e olan borcuna karşılık attar dükkânındaki malları rehin verdiği Attâr gediği istiğlâli Ma‘rûz Attâr es-Seyyid el-Hâc Hâfız Abdullah b. es-Seyyid Abdullah meclis-i şer‘-i münîrde bâ‘isü’l-i‘lâm Attâr Molla Mustafa b. el-Hâc Mehmed mahzarında Mehmed Ağa b. el-Hâc Ali hâzır olduğu hâlde benim mezbûr Molla Mustafa’ya beynimizde ma‘lûm attâr emti‘ası semeninden ba‘de külli’l-hesâb sahhe’l-bâkī zimmetimde bin guruş on iki para deynim olup meblağ-ı mezkûr mukābelesinde Mısırçarşısı’nda kâin attâr dükkânı derûnunda mevcûde müstakillen yedimde [89a] malım olan bâ-defter-i müfredât mecmu‘u dokuz yüz kırk guruş otuz iki para kıymetli attâr metâ‘ımı dâyînim mezbûra rehin ve teslîm ol dahi yedimden irtihân ve kabz edip târih-i i‘lâmdan üç gün tamamında deyn-i mezkûrumu edâ ve teslîm-birle fekk-i rehin etmek üzere ta‘ahhüd etmemle vakt-i mezkûr hulûlünde benim için eda-i deyn müyesser olmaz ise rehân-ı mezkûreyi kıymetleri olan ol mikdâr guruşa bey‘ ve semenini deyn-i mezkûrumun ol mikdârına takāsan dâyînim mezbûra ifâya hâzır-ı mezbûr Mehmed Ağa’yı tarafımdan “Küllemâ azeltüke fe-ente vekîli” mefhûmu üzere azil ve in‘izâlden masûne ve akd-i rehinde meşrûta vekâlet-i devriye-i sahîha ile vekîl nasb ve ta‘yîn eylediğimde ol dahi vekâlet-i merkūmeyi kabûl ve merâsimini edâya müte‘ahhid olup bu vechile kat‘-ı münâza‘a eyledik dedikde merkūm Molla Mustafa ile hâzır-ı mezbûr Mehmed Ağa’dan her biri tasdîk eylediği İstanbul mahkemesinde tescîl ve huzûr-ı âlîlerine i‘lâm olundu. Fî-7 min Za sene [1]217