İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 507 Hüküm no: 596 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Bağdisar’ın, Tütüncü Semadrakili Kiryako v. Todori’ye tütün semeninden olan borcunu ödemesi gerektiği 285 guruş hüküm Ma‘rûz Sâhib-i arzuhâl Tütüncü Semadirekli Kiryako v. Todori nâm zimmî meclis-i şer‘-i hatîrde derûn-ı arzuhâlde merkūmü’l-ism Tütüncü Serkiz v. Bağdisar zimmî muvâcehesinde mesfûr Serkiz zimmî zimmetinde bundan akdem malımdan ve yedimden iştirâ ve kabz eylediği bâ-defter-i müfredât vezn ve fiyatı ma‘lûm duhân semeninden alacağım olan bin yetmiş altı guruşun beş yüz seksen beş guruşunu ahz etmemle bâkīsi olan dört yüz doksan bir guruşu zimmî-i mesfûrdan hâlâ taleb ederim deyü da‘vâ ettikde ol dahi cevâbında müdde‘î-i mersûmdan ancak dokuz yüz yetmiş guruşluk duhân iştirâ ve kabz etmişdim deyip ziyâde yüz altı guruş müdde‘âsını inkârından gayrı müdde‘î-i mersûmun kabzını mu‘terif olduğu meblağ-ı mezbûr beş yüz seksen beş guruşdan mâ‘adâ yüz guruş dahi kendiye def‘ ve teslîm etmemle ancak zimmetimde iki yüz seksen beş guruş deynim bâkī kalmışdır deyü mikdâr-ı mezkûrda eylediği def‘ine ikāmet-i beyyine edemeyip bi’t-taleb mersûm Kiryako zimmîye üç def‘a yemîn teklîf olundukda ol dahi yemînden nükûl etmeğin mûcebince mikdâr-ı mezkûrda mütâlebesiyle mersûm Kiryakom zimmî bî-vech-i şer‘î mu‘ârazadan ve ba‘de’l-men‘ ve sâlifü’l-beyân ziyâde yüz altı guruş müdde‘âsını beyâna havâle olunmağla mesfûr Serkiz zimmînin ikrârıyla lâzım gelen meblağ-ı bâkī iki yüz seksen beş guruşu müdde‘î-i mersûm Kiryako zimmîye edâsıyla mesfûr Serkiz zimmî ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-7 min Za sene [1]217