İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 507 Hüküm no: 597 Orijinal metin no: [89a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Osman b. Hasan’ın, Seyyid İbrahim b. Ahmed aleyhine açtığı alacak davasında iddiasını henüz ispatlayamadığı Mazbatadan derkenâr Ma‘rûz Derûn-ı arzuhâlde mezkûrü’l-ism Bakkāl el-Hâc Osman b. Hasan meclis-i şer‘-i münîrde sâhib-i arzuhâl es-Seyyid İbrahim b. es-Seyyid el-Hâc Ahmed mahzarında bin iki yüz on altı senesi Muharremi gurresinde mezbûr es-Seyyid İbrahim malımdan ve yedimden iktirâz ve kabz eylediği yedi yüz guruş deyni mukābelesinde İstanbul’da Hocakasım Günânî [89b] Mahallesi Avârızı Vakfı’ndan Edirnekapısı dâhilinde Atîkalipaşa Mahallesi’nde vâki‘ şehriye kırk beş akçe îcâre-i müecceleli mutasarrıf olduğu bir bâb vakıf menzilini bi-tarîkı’l-istiğlâl bana fâriğ olup ben dahi menzil-i merkūmu târih-i mezbûrda tahliyye-birle şehriye onar guruş kirâ mukāvelesiyle mezbûr es-Seyyid İbrahim’e îcâr ve teslîm ol dahi istîcâr ve kabûl ve hâlâ sâkin olmağla târih-i i‘lâma gelince yirmi iki ayda îcâre-i mezkûreden zimmetinde müctemi‘ olan iki yüz yirmi guruşun kırk guruşunu ceste ceste ahz etmemle bâkīsi olan yüz elli iki guruşu mezbûr es-Seyyid İbrahim’den hâlâ taleb ederim deyü da‘vâ ettikde ol dahi cevâbında müdde‘î-i mezbûrdan iktiraz ve kabz eylediğim meblağ-ı mezkûr yedi yüz guruş deynim mukābelesinde mutasarrıf olduğum menzil-i mezkûru bâ-re’y-i mütevellî mezbûr el-Hâc Osman’a vefâen fâriğ olup şehriye on guruş ile gerçi bana îcâr edip lâkin tahliyye ve teslîm bulunmamışdır deyü tahliyye ve teslîmi inkâr etmekle müdde‘î-i merkūm el-Hâc Osman ber-vech-i muharrer tahliyye ve teslîm müdde‘âsını isbât için meclis-i şer‘a ikāle [ikāme] eylediği iki nefer kimesneler müdde‘î-i mezbûrun da‘vâsına mutâbık edâ-yı şehâdet-i şer‘iyye edememeleriyle âhar şâhidlerim vardır demekle müdde‘âsını beyâna havâle olunduğu iki gün mukaddem târihiyle cerîdemde mazbût olmağla henüz faysal verilmeyip imtisâlen li-emri’l-âli da‘vâlarının zabtı İstanbul Mahkemesi’nden huzûr-ı âlîlerine i‘lâm olundu. Fî-13 min Za sene [1]217