İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 508 Hüküm no: 598 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp olan Saka İbrahim’in, İstanbul fincancılar hanındaki odasının açıldığı Oda küşâdı Ma‘rûz Sâdır olan fermân-ı âlîlerine imtisâlen sâhib-i arzuhâl nâm kimesnenin inhâsı üzere İstanbul’da fincancılar hânında sâkin iken bundan akdemce diyâr-ı âhara firâr ve gaybet-i münkatı‘a ile gāib olup hayat ve memâtı ve mekânı dahi ma‘lûm olmayan Saka İbrahim nâm mefkūdun hân-ı mezkûrda mukaffelen terk eylediği odasını feth ve küşâd ile derûnunda olan eşyâsını tahrîre kıbel-i şer‘den mürsel Kâtib Hasan Efendi dâ‘îleri ma‘an mürsel ümenâ-i şer‘le sâlifü’z-zikr odaya varıp mazbûtü’l-esâmî Müslimîn hâzır oldukları hâlde oda-i mezkûr feth ve küşâd ve derûnunda mevcûd bulunan bir cild Muhammediye kitabı ve dört cilt risâle ve beş vakıyye pembe ve bir yorgan ve bir baş yasdığı ve iki top bogasî ve bir buçuk top çit ve iki penbe gömlek ve bir köhne hırka ve bir aba şalvar ve bir köhne anteri ve bir çift bohça ve bir heybe ve bir sagīr yorgan ve beş vakıyye tarhana ve üç kilim ve sagīr elvân ve beş seccâde ve yarım top kırmızı bez ve bir mest papuç ve bir abdest ibriği ve bir tas ve bir şerbet ibriği ve bir mısır kaliçi ve üç terazi ma‘a iki vakıyye derâhim ve bir musluk ve bir kürek ve havan eli ve iki akçe tahtası ve iki gırâr ve bir devat ve bir tehî çekmece mevcûd bulunup mâ‘adâ nesne bulunmamağla eşyâ-yı mezkûre ke’l-evvel oda-i merkūmda terk ve kapısı kilitlenip temhîr eylediğini Mevlânâ-yı mezbûr ma‘an mürsel ümena-i şer‘le meclis-i şer‘de inhâ eylediği ma‘lûm-ı devletleri buyruldukda ne vechile emr-i âlîleri buyrulur ise ol bâbda emr u fermân hazret-i veliyyü’l-emrindir. Fî-9 min Za sene [1]217