İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 509 Hüküm no: 600 Orijinal metin no: [89b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hüseyin’in, kocası Sengerîzâde Mustafa b. Hüseyin ile muhâlaa yoluyla boşandıkları ve birbirlerinin zimmetlerini ibrâ ettikleri Muhâla‘a-i Sengerîzâde ve ibrâ-i âm Ma‘rûz İstanbul’da Fatih Sultan Mehmed Hân Câmi‘-i şerîfi kurbünde Hoca Hayreddin Mahallesi’nde sâkine ve zâtı mahalle-i mezbûre İmâmı Mustafa Efendi b. Salih ve es-Seyyid Mehmed Efendi b. es-Seyyid Kasım ta‘rîfleriyle mu‘arrefe olan Emine bt. Hüseyin nâm hatun Çarşamba günü dîvân-ı âlide huzûr-ı âsafânelerinde ba‘dehû du‘âhâne-i dâ‘îlerinde ma‘kūd meclis-i şer‘-i münîrde zevc-i muhâlı‘ı sâhib-i arzuhâl Sengerîzâde Mustafa b. Hüseyin mahzarında mezbûr Mustafa zevc-i dâhilim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun aleyh olan iki yüz yetmiş beş guruş mehr-i müeccelim ve nafaka-i iddet-i ma‘lûmem ve cihet-i karzdan dahi zimmetinde hakkım olan yüz yetmiş beş guruş bedel-i hul‘ üzerlerine ve meûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetden işbu târih-i i‘lâma gelince beynimizde cereyân eden cemî‘-i ahd ve i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika mutlakan âmme-i de‘âvî ve mütâlebâtdan ben merkūm Mustafa’nın ol dahi benden yedinde olan bir kıt‘a müfredât-ı defter mantûkunca dört yüz guruş beyaz akçe ile mecmû‘u iki bin guruş kıymetli iddi‘â eylediği eşyâ-i ma‘lûmeye vesâir cemî‘-i hukūk-ı şer‘iyyeye müte‘allika âmme-i de‘âvî ve mütâlebâtdan benim zimmetimi kat‘an hakkımız ve alacağımız kalmamak ma‘nâsına her birimiz şürût-ı müfside ve uhûd-ı mübtileden âri ve cebr ve kerhden hâli ibrâ-i âmm-ı sahîh-i şer‘î [90a] ile ibra ve iskāt ve her birimiz ber-minvâl-i meşrûh âharın ibrâsını kabûl ve bu vechile külliyen kat‘-ı münâza‘a eyledik deyü mezbûre Emine Hatun’un bi’l-cümle takrîr-i meşrûhunu mezbûr Mustafa tasdîk eylediği İstanbul mahkemesinde tescîl ve huzûr-ı âlîlerine i‘lâm olundu. Fî-9 min Za sene [1]217