İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 510 Hüküm no: 601 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habîbe bt. Hüseyin’in, Habeşli Hatice isimli cariye’yi kocası Hüseyin b. İsmail’e teslim etmesi gerektiği Câriye teslîmine tenbîh Ma‘rûz Sadrâzam çukadârlarından Kastamonulu Hüseyin b. İsmail meclis-i şer‘-i münîrde hâlâ zevcesi mu‘arrefetü’z-zât Habîbe bt. Hüseyin nâm hatun mahzarında zevcem mezbûre Habîbe Hatun’un yedinde olup işbu meclis-i şer‘de mu‘âyene olunan ma‘lûmetü’l-vasf Habeşiye Hatice nâm bir re’s câriye müstakilleten mülküm olup zevcem mezbûre Habîbe Hatun câriyem merkūmeyi fuzûlî zapt etmekle zikr olunan câriyeyi bana teslîme zevcem mezbûreye tenbîh olunmak matlûbumdur deyü da‘vâ ol dahi cevâbında zevcim mezbûr Hüseyin câriye-i mevsûfe-i merkūmeyi yedinde mülkü olduğu hâlde bana hibe-i sahîha-i şer‘iyye ile hibe ve teslîm ben dahi meclis-i hibede ittihâb ve kabz etmemle mülk-i mevhûbum olmak üzere bi-hakkın zabt ve vaz‘-ı yed ederim deyü eylediği def‘ine ikāmet-i beyyineden ızhâr-ı acz edip istihlâf etmekle mezbûr Hüseyin vech-i şer‘î üzere tahlîf olunmağın mûcebince zikr olunan câriyeyi zevci müdde‘î-i mezbûr Hüseyin’e teslîme zevcesi mezbûre Habîbe Hatun’a tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-11 min Za sene [1]217