İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 511 Hüküm no: 602 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. İsmail’in, kaynanası Hayrünnisa bt. Mehmed aleyhine açtığı alacak davasında iddiasını ispat edemediğinden muarazadan men edildiği 1.350 guruş ile 511 guruşluk eşyâ da‘vâsından men‘ Ma‘rûz Sâhib-i arzuhâl sadrıazam çukadârlarından Kastamonulu Hüseyin b. İsmail meclis-i münîrde üvey kayın vâlidesi mu‘arrefetü’z-zât Hayrünnisa bt. Mehmed nâm hatun mahzarında zevce-i menkûham işbu hâzıra bi’l-meclis Habîbe Hatun ile üvey vâlidesi merkūme Hayrünnisa Hatun bir menzilde bi’l-ma‘iyye sâkinler iken malımdan mecmû‘u beş yüz on bir guruş kıymetli yirmi beş top kutnî ve bir Selanik keçesi ve bir Selanik kaliçe mak‘ad ve yirmi beş çift havlu ve bir minder ve bir cedîd Kıbrıskâri yorgan ve cedîd dokuz beledî yastık ve altı Kıbrıskâri bohça ve dört Kıbrıskâri Ahmediye ve iki Hindkâri Ahmediye ve bir top Şam kutnîsi ve bir Acemkâri yorgan ve dört silecek ve iki cedîd gömlek ile nakden bin üç yüz elli guruşumu dahi bi-gayr-ı hakkın ahz etmekle eşyâ-i muharrere-i mezkûre ile meblağ-ı merkūm bin üç yüz elli guruşu mezbûre Hayrünnisâ Hatun’dan taleb ederim deyü ba‘de’d-da‘vâ ve’l-inkâr müdde‘î-i merkūm Hüseyin ber-vech-i muharrer müdde‘âsına ikāmet-i beyyine edemeyip bi’t-taleb mezbûre Hayrünnisâ Hatun vech-i şer‘î üzere tahlîf olunmağın mûcebince müdde‘î-i mezbûr Hüseyin da‘vâ-yı mezkûresiyle mezbûre Hayrünnisâ Hatun bilâ-beyyine-i âdile mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-10 min Za sene [1]217