İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 511 Hüküm no: 603 Orijinal metin no: [90a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mike ve Estemat’ın, Peştemâlcioğlu Sahak v. Parsih’e olan borcunu taksitle ödeyebilecekleri 800 guruş edâya tenbîh 1.900 guruşu beher mâh 100 guruşa taksît Ma‘rûz Bezzâz esnâfından derûn-ı arzuhâlde merkūmü’l-ism Peştemâlcioğlu Sahak v. Parsih nâm zimmî meclis-i şer‘-i münîrde kazzâz esnâfından sâhib-i arzuhâl Sakızlı Mike v. Yani oğlu İstemad zimmîler muvâcehelerinde benim gāib ani’l-meclis damadım Kozikoğlu Ohannes zimmî zimmetinde karzdan beş bin guruş alacağım olup ve medyûnum damadım mesfûrun dahi işbu mesfûrân Mike ve İstemad zimmîler zimmetlerinde bedel-i sulh-i sahîhden kezâlik beş bin guruş alacak hakkı olmağla medyûnum damadım mesfûr târih-i i‘lâmdan otuz bir ay mukaddem beni deyn-i mezkûruyla ol mikdâr medyûnları mersûmân Mike ve İstemad zimmîler üzerlerine cümlemiz bir meclisde hâzırlar olduğumuz hâlde havâle-i mukayyede-i sahîha ile havâle ve her birimiz havâle-i mezkûreyi kabûl edip ol vechile cihet-i havâle-i mezkûreden zimmîyân-ı mersûmânın zimmetlerinde bana deynleri olan meblağ-ı muhâllün-bih-i mezkûrdan her biri âharın hissesine lâzım gelen meblağa kefîl ve zâmin olmalarıyla ben dahi kefâlet-i mezkûrelerini kabûl ve târih-i mezbûrdan beher şehr yüzer guruş vermek üzere mesfûrânı rızâmla te’cîl edip hatta zimmîyân-ı mersûmân vech-i meşrûh üzere ol mikdâr guruş asâleten ve kefâleten zimmetlerinde bana deynleri olduğunu nâtık işbu bir kıt‘a temessükü yedime i‘tâ ettiklerinden sonra meblağ-ı müeccel-i mezkûrdan mâhiye yüzer guruşdan yirmi üç ayda iki bin üç yüz guruş bana def‘ ve teslîm etmeleriyle ben dahi yedlerinden kabz edip mâ‘adâ târih-i i‘lâma gelince sekiz aydan beri nesne vermemeleriyle bâkīsi olan iki bin yedi yüz guruşdan zikr olunan sekiz ayda iktizâ eden sekiz yüz guruşu hâlâ mâ‘adâsı olan bin dokuz yüz guruşu dahi ber-vech-i meşrûh taksîtleri hulûlünde zimmîyân-ı mesfûrândan asâlet ve kefâletlerine binâen taleb ederim deyü da‘vâ ettikde onlar dahi cevâblarında kaziyye minvâl-i meşrûh üzere olduğunu ber-vech-i muharrer kefâletlerini ve temessük-ı mezkûru i‘tâ eylediklerini bi-tamâmihâ tâyi‘an ve kat‘iyyen ikrâr u i‘tirâf etmeleriyle alâ-mûceb-i i‘tirâfihimâ meblağ-ı bâkī-i mezkûr iki bin yedi yüz guruşun sekiz yüz guruşunu hâlâ müdde‘î-i mersûm Sahak zimmîye edâsıyla mâ‘adâsı olan bin dokuz yüz guruşu mâh be-mâh yüzer guruş vermek üzere zimmîyân-ı mersûmân ilzâm olundukları İstanbul Mahkemesi’nden huzûr-ı âlîlerine i‘lâm olundu. Fî-14 min Za sene [1]217