İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 512 Hüküm no: 604 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memiş Usta b. Mehmed’in, Mehmed b. Mustafa aleyhine açtığı menzil ferağı davasının reddedildiği Meşrûta-i menzil ferağ da‘vâsı iltifâta şâyân olmayıp mu‘ârazadan men‘ Ma‘rûz Sâhib-i arzuhâl Memiş Usta b. Mehmed nâm kimesne meclis-i şer‘-i münîrde zikri âtî menzile ale’l-iştirâki’s-seviyy mutasarrıflar olup kendiden asîl zevcesi Şerîfe Zeliha bt. es-Seyyid Halil nâm hatun tarafından husûs-ı âtîde vekîl olduğu zâtını ârifân Hüseyin b. Hüseyin ve es-Seyyid Mehmed b. Hüseyin şehâdetleriyle es-Seyyid Mehmed b. es-Seyyid Mustafa mahzarında İstanbul’da Cumartesipazarı nâm mahalde Molla Ahaveyn Mescid-i şerîfinde Müezzin olan Molla Mustafa b. Hüseyin hâzır olduğu hâlde merhûm İsmail Çelebi nâm sâhibü’l-hayrın galle ve tevliyeti mescid-i şerîf-i mezbûrda müezzin olanlara meşrûta vakfı olup mahalle-i mezbûrede vâki‘ ma‘lûmü’l-hudûd ve şehriye otuz akçe îcâre-i müecceleli bir bâb vakıf menzili zevcem Zenciye Fâtıma bt. Abdullah’ın bâ-temessük-ı mütevellî taht-ı tasarrufunda iken işbu târih-i i‘lâm senesi Ramazani’l-mübâreğinin yirminci günü zevcem mezbûre hasta ve sâhibe-i firâş olmağla mutasarrıfe olduğu menzil-i mezbûrun ancak nısfını hüsn-i rızâsıyla bana fâriğa olup lâkin mütevellî-i hâzır-ı merkūm zevcem mezbûrenin ferağından bana izin vermeyip ve temhîr-i temessük dahi etmeyip bir hafta mürûrunda zevcem merkūme bilâ-veled fevt olmağla mahlûlünden mütevellî-i hâzır-ı merkūm menzil-i mezkûru iki yüz otuz guruş îcâre-i mu‘accele ve îcâre-i müeccele-i kadîmesiyle işbu mezbûr es-Seyyid Mehmed ile zevcesi müvekkile-i mezbûre Şerîfe Zeliha Hatun’a ale’l-iştirâki’s-seviyy îcâr ve teslîm etmiş olup lâkin menzil-i mezkûrun nısfını mücerred zevcem müteveffiye-i merkūme hayatında bana fâriğa olduğuna binâen nısf menzil-i mezkûrdan keff-i yedlerine tenbîh olunmak murâdımdır deyü takrîr-i meşrûhu üzere izn-i mütevellî bulunmadığını mukır ve mu‘terif iken mücerred ferağa binâen tasaddî eylediği da‘vâ-yı mezkûresi şer‘an mesmû‘a ve iltifâta şâyân olmamağla bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-13 min Za sene [1]217