İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 514 Hüküm no: 606 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İsmail’in, Haririzâde Hüseyin Ağa b. Ali’ye olan borcunu ödemesi gerektiği 1.253 guruş hüküm Ma‘rûz Sâhib-i arzuhâl Harîrî es-Seyyid el-Hâc Hüseyin Ağa b. es-Seyyid Ali meclis-i şer‘-i münîrde derûn-ı arzuhâlde mezkûrü’l-ism Kuruyemişçi Mehmed b. İsmail mahzarında mezbûr Mehmed zimmetinde iki yüz on beş senesi Cumâdelûlâsının on beşinci günü târihiyle muvarrah bir kıt‘a temessük mantûkunca cihet-i karzdan bin guruş ve yine iki yüz on altı senesi Saferinin on beşinci günü târihiyle muvarrah diğer bir kıt‘a temessük mantûkunca kezâlik cihet-i karzdan iki yüz guruş ve hâric ez-temessük yine cihet-i mezkûreden elli guruş ki cem‘an bin iki yüz elli üç guruş alacak hakkım olmağla meblağ-ı mecmû‘-ı mezkûru mezbûr Mehmed’den taleb ederim deyü da‘vâ ettikde ol dahi cevâbında cihet-i merkūmeden meblağ-ı mecmû‘-ı merkūm bin iki yüz elli üç guruş el-yevm zimmetinde müdde‘î-i mezbûra sahîhan deyni olduğunu bi-tamâmihî tâyi‘an ve kat‘iyyen ikrâr u i‘tirâf etmeğin alâ-mûceb-i i‘tirâfihi meblağ-ı mecmû‘-ı mezkûr bin iki yüz elli [91a] üç guruşun müdde‘î-i mezbûr el-Hâc Hüseyin’e edâsıyla merkūm Mehmed ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-20 min Za sene [1]217