İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 515 Hüküm no: 607 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Artin v. Mesrob’un, İmamoğlu Salih b. Veliyüddin ile bedel-i sulh karşılığında anlaştığı 560 guruş murâbaha da‘vâsından 250 guruşa sulh Ma‘rûz Derun-ı arzuhâlde merkūmü’l-ism Tütüncü Artin v. Mesrob nâm zimmî meclis-i şer‘-i hatîrde sâhib-i arzuhâl habbâz tâifesinden İmâmoğlu Salih b. Veliyüddin muvâcehesinde mezbûr Salih zimmetinde bâ-temessük cihet-i karzdan üç yüz yirmi guruşdan bâkī üç yüz iki guruş alacak hakkım olmağla meblağ-ı bâkī-i mezbûru merkūm Salih’den taleb ve da‘vâ eylediğimde ol dahi cevâbında meblağ-ı merkūmun yüz doksan guruşu karz mâ‘adâsı bilâ-devr ribâ olduğundan gayrı murâbaha nâmıyla sana ceste ceste malımdan beş yüz altmış guruş verdim deyü benden istirdâd da‘vâsına tasaddî ve ol vechile beynimizde ba‘de vukū‘ı’l-münâza‘a bâ-vesâtet-ı muslihîn ben da‘vâ-yı mezkûremden merkūm Salih ile bi’t-tav‘ ve’r-rızâ iki yüz elli guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ üç yüz iki guruşa varınca ziyâdesi olan elli iki guruşa ol dahi benden tasaddî eylediği murâbaha istirdâdına müte‘allika âmme-i de‘avîden her birimiz âharın zimmetini şürût-ı müfside ve uhûd-ı mübtileden âri ve cebr ve kerhden hâli ibrâ-i âmm-ı sahîh-i şer‘î ile kabûlü hâvi ibrâ ve iskāt eylediğimizden sonra sâlifü’l-beyân ibrâdan istisnâ olunan bedel-i sulh-ı merkūm iki yüz elli guruşun yüz guruşunu târih-i i‘lâm günü mezbûr Salih’den iştirâ ve kabz eylediğim bir re’s doru bârgir semeni olan yüz guruşa bi’t-terâzi takās ve mahsûb ile istîfâ etmemle bâkīsi olan yüz elli guruşu dahi târih-i i‘lâmdan sekiz ay tamamına değin ceste ceste bana edâ ve îfâ etmek üzere istimhâl etmekle ben dahi rızâmla medyûnum mezbûru vech-i meşrûh üzere imhâl ve te’cîl eyledim deyü zimmî-i mersûmun bi’l-cümle takrîr-i meşrûhunu mezbûr Salih tasdîk eylediği İstanbul mahkemesinde tescîl ve huzûr-ı âlîlerine i‘lâm olundu. Fî-18 min Za sene [1]217