İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 516 Hüküm no: 608 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Ahmed’in, Havvâ bt. Abdullah’tan satın aldığı Mahbûbe isimli cariyenin illetli olması sebebiyle geri verildiği Zenciye câriye reddi 555 guruşu dahi edâya tenbîh Ma‘rûz Sâhibe-i arzuhâl mu‘arrefetü’z-zât Ümmügülsüm bt. Ahmed nâm Hatun meclis-i şer‘-i münîrde derûn-ı arzuhâlde mezkûrü’l-ism Havvâ bt. Abdullah b. Abdullah nâm hatun tarafından husûs-ı âtîde vekîl olduğu zâtını ârifân Hüseyin b. Mustafa ve Kahveci Mustafa b. Mustafa şehâdetleriyle sâbit olan es-Seyyid Ebûbekir b. Hasan muvâcehesinde târih-i i‘lâmdan üç ay mukaddem cemî‘-i uyûbdan sâlime olmak üzere beş yüz elli beş guruş semen-i medfû‘ ve makbûza müvekkile-i mezbûre Havvâ Hatun’dan iştirâ ve kabz eylediğim işbu hâzırati bi’l-meclis orta boylu açık kaşlı ela gözlü bir re’s zenciye Mahbûbe nâm câriye ihtibâs-hayz illeti ile mu‘ayyibe ve ayb-ı mezkûr şirâ târihinden kadîm ve inde’t-tüccâr noksan semen îcâb eder uyûbdan olmağla redd-i semen ve kabz-ı mebî‘ olunmak üzere müvekkile-i mezbûre Havvâ Hatun’a izâfetle vekîl-i merkūma tenbîh olunması matlûbumdur deyü teveccüh-i husûmet bulundukdan sonra da‘vâ ettikde vekîl-i mezbûr dahi cevâbında müvekkile-i mezbûre Havvâ Hatun câriye-i mevsûfe-i merkūmeyi târih-i mezkûrda mu‘tâd olan nevâzil tâ‘bir olunur öksürükden gayrı nesnesi olmamak üzere cemî‘-i uyûbdan sâlime olarak meblağ-ı merkūm beş yüz elli beş guruş semen-i medfû‘ ve makbûza müdde‘iye-i merkūme Ümmügülsüm Hatun’a bey‘ ve teslîm etmişdir deyü bi’l-vekâle ikrâr lâkin ayb-ı mezkûrun kadîm olduğu müvekkilem merkūmenin ma‘lûmü değildir deyü inkâr etmekle müdde‘iye-i mezbûre Ümmügülsüm Hatun câriye-i mevsûfe-i merkūmenin altı aydan mütecâviz zamândan beri illet-i mezbûreye mübtelât olup ol vechile mu‘ayyibe ve ayb-ı mezkûr câriye-i merkūmede kadîm olduğunu etibbâ-i hâssadan bâ-fermân-ı âlî ehl-i hibre ta‘yîn olunan udûl-i Müslimînden İbrahim Efendi b. Mustafa ve Halil Efendi b. İbrahim şehâdetleriyle muvâcehesinde vech-i vecih-i şer‘î üzere ba‘de’l-isbât ve’l-halef mûcebince câriye-i merkūmeyi ahz ve makbûzu olan semen-i merkūm beş yüz elli beş guruşu müdde‘iye-i merkūme Ümmügülsüm Hatun’a red ve teslîme müvekkilesi mezbûre Havvâ Hatun’a izâfetle vekîl-i mezbûr es-Seyyid Ebûbekir’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-19 min Za sene [1]217