İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 516 Hüküm no: 609 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eminönün’de manav dükkânı gediğinin Şerife Hafize Hatun’a babasından miras kaldığı Eminönü’nde manav gediği ihbârı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda İstanbul’da Eminönü nâm mahalde vâki‘ bir tarafı tütüncü mahzeni ve bir tarafı pirinççi mahzeni ile mahdûd ve sermâyeci mahzeni tâ‘bir olunur bir bâb manav dükkânı derûnunda mevcûde âlât-ı ma‘lûme es-Seyyid Ahmed Çelebi b. Ahmed nâm kimesnenin yedinde mülkü ve bin yüz seksen iki târihinde mahzen-i mezkûrun bi’l-îcâreteyn mutasarrıfı Tüfenkçibaşı el-Hâc Hasan nâm kimesnenin izin ve icâzetiyle gedik olmak üzere mutasarrıf olup ve etrâfında kâin sâir manav dükkânları dahi kadîmden beri esnâf-ı sâire misillü gedik olmak üzere tasarruf oluna gelmekle esnâf-ı mezbûreye mahsûs bi’l-cümle dekâkîn pazarbaşı defterinde mukayyed ve mu‘teber ve ma‘dûd gediklerden olup mezbûr es-Seyyid Ali Çelebi fevt oldukda âlât-ı lâzıme-i mezkûre sulbî kebîr oğlu es-Seyyid Ahmed’e ba‘de’l-intikāl mezbûr es-Seyyid Ahmed dahi fevt olmağla sulbiye-i kebîre kızı ve hasran vârisesi sâhibe-i arzuhâl Şerîfe Hafize Hatun’a müstakillen mevrûs olmuşdur deyü kurb ve civârında olan esnâf-ı mezbûreden ve udûl-i Müslimînden el-Hâc Mehmed ve el-Hâc Ali ve el-Hâc Ahmed ve Tokâdîzâde es-Seyyid el-Hâc Ahmed ve es-Seyyid Yakub ve es-Seyyid Osman ve Molla İbrahim ve pazarbaşıları Hâfız İsmail’den her biri meclis-i şer‘-i münîrde alâ-tarîkı’ş-şehâde haber verdiklerinden mâ‘adâ [91b] esnâf-ı merkūmenin Tersâne-i Âmire’de istihdâm için bâ-fermân-ı âlî veregeldikleri altmış dört nefer amelenin iktizâ eden ücretleri gedik ashâbına tarh ve tahmîl ile cem‘ ve tahsîl olunduğu ve içlerinden fevt olanların gedikleri ma‘rifet-i şer‘le bey‘ ve semeni düyûnuna tevzî‘ ve taksîm ve düyûnu olmayanların veresesine intikāl ve bilâ-vâris fevt olanların gedikleri cânib-i beytülmâlden füruht olunageldiği derkenârdan müstebân olmağla emsâli mesbûk olduğu üzere sâlifü’z-zikr gedik tâ‘bir olunan âlât-ı lâzıme-i ma‘lûme mezbûre Şerîfe Hafîze Hatun’un babasından mevrûs yedinde müstakilleten mülkü olduğu Başmuhâsebe’ye kayd ve yedine sûret i‘tâ buyrulmak bâbında istid‘âsı muvâfık-ı re’y-i âlileri buyrulur ise ol bâbda emr u fermân hazret-i veliyyü’l-emrindir. Fî-13 min Za sene [1]217