İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 517 Hüküm no: 610 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ziştovili Göncüoğlu Molla Ali’nin, ortağı Odunkapılı İmamzâde Ahmed’e olan borcunu ödemesi gerektiği Şirket-i ticâretden bâkī 3.226,5 guruş edâya tenbîh Ma‘rûz Âsitâne-i aliyyede Balkapanı tüccârından Odunkapılı İmâmzâde demekle arîf el-Hâc Ahmed nâm kimesne meclis-i şer‘-i hatîrde sâbıkā şerîki Ziştovili Göncüoğlu Molla Ali b. Mustafa nâm kimesne mahzarında bin iki yüz on altı senesi Muharremi gurresinde ben malımdan bin iki yüz elli guruş ifrâz ol dahi kezâlik malından bin iki yüz elli guruş ifrâz ve birbirine halt edip mezbûr Molla Ali’ye teslîm ve fâide-i hâsıla beynimizde beraber olmak üzere balkapanı ticâretinden akd-i şirket edip meblağ-ı mecmû‘-ı merkūmu ba‘de’l-kabz târih-i i‘lâma gelince yirmi iki ay müddetde meblağ-ı mezbûru i‘mâl ile Eflak ve Boğdan memleketlerinden vesâir ol havâlîden envâ‘-ı revgan ve asel ve peynir ve zehâir-i sâire iştirâ ve bana irsâl ben dahi râyici vech üzere Âsitâne-i aliyyede bey‘ ve semenlerini kabz edip şerîkim mezbûrun poliçe tarîkiyle benim üzerime ceste ceste havâle eylediği mahallere verdiğim cem‘an kırk dokuz bin altı yüz bir guruş mezbûr Molla Ali tarafına geçmiş olup bu esnâda fesh-i akd-i şirket-birle kapan-ı mezkûr nâzırı ve tüccârı ma‘rifetleriyle şirket-i mezkûrenin hesabını sehv ve galatdan âri yegān yegān hesâb-ı sahîh ile rü’yet eylediğimizde mârru’z--zikr müddet-i şirketimiz olan yirmi iki ayda bana irsâl eylediği zehâir-i mütenevvi‘a-yı mezkûrenin mesârifiyle ma‘an re’s-i mâlı elli bin üç yüz on sekiz guruşa bâliğ olup zehâir-i mütenevvi‘a-yı merkūmenin bir mikdârı esnâ-i tarîkde bi-kazâillâhi te‘âlâ telef ve zâyi‘ olmuş olmağla mâ‘adâ sâlimen yedime vâsıl olan zehâir-i ma‘lûme Âsitâne-i aliyyede râyici vech üzere bey‘ olunup mesârifâtı ihrâc olundukdan sonra mecmû‘u kırk iki bin üç yüz otuz bir guruşa bâliğ olmağla re’s-i mâl meblağ-ı merkūm elli bin üç yüz on sekiz guruşdan fürû-nihâde ve tenzîl olundukda yedi bin dokuz yüz seksen yedi guruş zarar terettüb etmekle sâlifü’l-beyân sermâyemiz müsâvî olduğuna binâen terettüb eden zarar-ı mezkûru dahi teberru‘an re’s-i malımıza göre münâsafaten iktizâ etmekle ol vechile zarar-ı mezkûrdan benim hisseme isâbet eden üç bin dokuz yüz doksan üç buçuk guruş tenzîl olunup mâ‘adâsı olan üç bin dokuz yüz doksan üç buçuk guruşu bâlâda zikr olunduğu üzere mezbûr Molla Ali kıbeline poliçe tarîkiyle geçen meblağ-ı mezbûr kırk dokuz bin altı yüz bir guruşdan bana reddi iktizâ etmekle meblağ-ı merkūm üç bin dokuz yüz doksan üç buçuk guruşun yedi yüz on yedi guruşu poliçe defteri hesâbı üzere benim kıbelimde zuhûr edip ve elli guruş dahi Ziştovili Molla Ahmed nâm kimesnenin vâlidesinden havâle tarîkiyle ahz olunup ol vechile cem‘an altı yüz altmış yedi guruşunu istîfâ etmemle bâkīsi olan üç bin iki yüz yirmi altı buçuk guruşu mezbûr Molla Ali’den hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu ve sehv ve galatdan âri hesab-ı sahîh ile rü’yet-i muhâsebe eylediklerini ve meblağ-ı bâkī-i mezkûr üç bin iki yüz yirmi altı buçuk guruş zimmetinde zuhûr edip müdde‘î-i mezbûr el-Hâc Ahmed’e sahîhan deyni olduğunu kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihi meblağ-ı bâkī-i mezkûr üç bin iki yüz yirmi altı buçuk guruşu müdde‘î-i merkūm el-Hâc Ahmed’e edâsıyla mezbûr Molla Ali ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-5 min Za sene [1]217