İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 519 Hüküm no: 611 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Halis Efendi b. Osman’ın, Amasya’lı Abdülkadir b. Mehmed’e olan borcunu ödemesi gerektiği 1.000 guruşdan 300 guruşa sulh-i edâya tenbîh Ma‘rûz Sâhib-i arzuhâl Amasyavî Kethüdâzâde Abdülkādir b. Mehmed meclis-i şer‘-i münîrde derûn-ı arzuhâlde mezkûrü’l-ism mâliye kalemi ketebelerinden Mehmed Halis Efendi b. el-Hâc Osman mahzarında ben bundan akdem Amasya’da sâkin iken poliçe tarîkiyle İstanbul’da sâkinler Tamatlı el-Hâc Yusuf nâm kimesneden bâ-tahvîl dört yüz yirmi guruş ve Kırımlı el-Hâc İbrahim nâm kimesneden beş yüz seksen guruş ki cem‘an bin guruşumu merkūmândan poliçe temessükleri mantûklarınca kabza mezbûr Mehmed Halis Efendi’yi tevkîl ve ihâle etmemle ol dahi meblağ-ı mecmû‘-ı merkūmu mezbûrândan ahz edip bana vermeyip kendi umûruna sarfla istihlâk etmekle ben dahi meblağ-ı mezbûru işbu târih-i i‘lâm senesi Rebî‘ülâhirinde sadr-ı [92a] sâbık Semahatlü atûfetlü Veliyüddin Efendizâde Mehmed Emin Efendi hazretlerinin zamân-ı sadâretlerinde huzûrlarında taleb ve da‘vâ eylediğimde ol dahi müdde‘âmı inkâr-birle beynimizde ba‘de vukū‘ı’l-münâza‘a bâ-vesâtet-ı muslihîn ben da‘vâ-yı mezkûremden mezbûr Mehmed Halis Efendi ile üç yüz guruşa ba‘de akdi’l-musâlahati ve’l-kabûl mâ‘adâya ve hukūk-ı sâireye müte‘allika âmme-i de‘avîden mezbûrun zimmetini kabûlü hâvi ibrâ ve iskāt eylediğimden sonra mezbûr Mehmed Halis Efendi sâlifü’l-beyân ibrâdan müstesnâ bedel-i sulh-i merkūm üç yüz guruş zimmetinde bana sahîhan deyni olduğunu hat ve hatmini hâvi mu‘anven mersûm karz ünvanıyla bir kıt‘a temessükü yedime i‘tâ ve yüz yirmi bir gün mürûrunda edâya ta‘ahhüd etmişken hâlâ vermemekle meblağ-ı merkūm üç yüz guruşu mezbûr Mehmed Halis Efendi’den taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu ve temessük-ı mezkûru i‘tâsını bi-tamâmihâ kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihi meblağ-ı merkūm üç yüz guruşun müdde‘î-i merkūm Abdülkādir’e edâsıyla mezbûr Mehmed Halis Efendi ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-16 min Za sene [1]217