İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 519 Hüküm no: 612 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın, Şerife Emine bt. Ahmed’e borcunu ödemesi gerektiği 236 aded yaldız altını mu‘ârazadan men‘ ve elli guruş edâya tenbîh Ma‘rûz Sâhibe-i arzuhâl mu‘arrefetü’z-zât Şerîfe Emine bt. es-Seyyid Ahmed nâm Hatun Çarşamba günü Dîvân-ı âlide huzûr-ı âsafânelerinde ba‘dehû du‘âhâne-i dâ‘îlerinde ma‘kūd meclis-i şer‘-i münîrde derûn-ı arzuhâlde mezkûretü’l-ism zâtı mu‘arrefe Âişe bt. Abdullah nâm Hatun muvâcehesinde mezbûre Âişe Hatun zimmetinde bundan akdem malımdan ve yedimden iktirâz ve kabz eylediği elli guruş deyni mukābelesinde malından elli guruş kıymetli işbu yedimde olup mu‘âyene olunan bir elmas yüzüğünü bana rehin ve teslîm ben dahi irtihân ve kabz etmişdim hâlâ meblağ-ı mezbûru bana edâ-birle zikr olunan yüzüğü rehniyetden fek ve ahza mezbûre Âişe Hatun’a tenbîh olunmak murâdımdır deyü da‘vâ ettikde ol dahi cevâbında ben zikr olunan yüzüğü müdde‘iye-i merkūmeye âriyet tarîkiyle vermişdim deyip meblağ-ı mezbûru iktirâzını inkârından mâ‘adâ târih-i i‘lâmdan beş sene mukaddem İstanbul’da Kumkapı civârında serdarlar kâtibi esbak Abdullah Efendi’nin konağında malımdan yüz otuz altı aded yaldız altını ve bir fındık nısfiyesi altınlarımı müdde‘iye-i mezbûre Şerîfe Emine Hatun’a li-ecli’l-hıfz îdâ‘ ve teslîm ol dahi ber-vech-i muharrer kabz ettikden sonra zikr olunan altınlardan ancak otuz yedi aded yaldız altınıyla bir fındık nısfiyesini bana red ve teslîm mâ‘adâsı olan doksan dokuz aded yaldız altınları yedinde kalmağla hâlâ taleb ederim deyü ba‘de’d-da‘vâ ve’l-istintak müdde‘iye-i mezbûre Şerîfe Emine Hatun cevâbında merkūme Âişe Hatun zikr olunan altınlardan kat‘an bana nesne îdâ‘ etmeyip bir akçe ve bir habbe almadım deyü îdâ‘ını külliyen inkâr etmekle tarefeynden her biri ber-minvâl-i muharrer müdde‘âlarına ikāmet-i beyyineden ızhâr-ı acz-birle her biri âharı istihlâf etmeğin müdde‘iye-i mezbûre Şerîfe Emine Hatun vech-i şer‘î üzere tahlîf olunup ve merkūme Âişe Hatun’a üç def‘a yemîn teklîf olundukda yemînden nükûl etmeğin mûcebiyle mezbûre Âişe Hatun da‘vâ-yı mezkûresiyle bilâ-beyyine mu‘ârazadan ba‘de’l-men‘ sâlifü’l-beyân yemînden nükûlüyle lâzım gelen meblağ-ı merkūm elli guruşu müdde‘iye-i mezbûre Şerîfe Emine Hatun’a edâ-birle zikr olunan yüzüğü rehniyetden fek ve ahz etmek üzere mezbûre Âişe ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-18 min Za sene [1]217