İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 520 Hüküm no: 613 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Estefan v. Davit’in borcuna karşılık Seyyid Mehmed b. İsmail’e rehin verdiği eskici ve manav dükkânlarını, borcunu ödediği için Estevan’a iade etmesi gerektiği Eskici İstefan’ın eskici ve manav dükkânlarının istiğlâlden fek i‘lâmı Ma‘rûz Mübârek rikāb-ı kamer-tâb-ı hüsrevânîye arzuhâl eden İstefan v. Davit nâm zimmî bi’l-ma‘iyye rü’yete me‘mûr Haremeyni’ş-şerîfeyn müfettişi müderrisîn-i kirâmdan Faziletlü Mehmed Atâullah Efendi ile Çarşamba günü arz odasında huzûr-ı âsafîde ma‘kūd meclis-i şer‘-i münîrde derûn-ı arzuhâlde mezkûrü’l-ism es-Seyyid Mehmed b. es-Seyyid el-Hâc İsmail muvâcehesinde Dârü’s-sa‘âdeti’ş-şerîfe ağası hazretlerinin nezâretlerinde âsûde evkāfdan merhûme kethüdâ Canfedâ Hatun Vakfı mütevellîsi es-Seyyid Halil Ağa b. Ahmed tarafından vekîl-i müsecceli câbi-i vakıf Hâfız el-Hâc Ömer b. İbrahim hâzır olduğu hâlde vakf-ı mezbûr musakkafâtından İstanbul’da Sultan Bayezid kurbünde Vezneciler sûkunda ma‘lûmü’l-hudûd bir bâb manav dükkânı müstakillen ve ittisâlinde vâki‘ bir bâb eskici dükkânının sülüse-i erbâ‘ı beher şehr cem‘an yüz yetmiş beş akçe îcâre-i müeccele ile işbu yedimde olan temessük-ı mütevellî mûceblerince bi’l-îcâreteyn taht-ı tasarrufumda iken bundan akdem bin iki yüz on dört senesi Muharremi’l-harâmının yirmi yedinci günü işbu merkūm es-Seyyid Mehmed Ağa’nın malından ve yedinden iktirâz ve kabz eylediğim altı yüz guruş deynim mukābelesinde deyn-i mezkûrumu her ne zamân edâ edersem redd-i ferağ olunmak üzere ol vechile bi-tarîkı’l-istiğlâl bâ-re’y-i mütevellî vefâen fâriğ olmamla el-hâletü hâzihi deyn-i mezkûrumu edâ-birle redd-i ferağ eylediğimde merkūm es-Seyyid Mehmed Ağa imtinâ‘ etmekle ber-vech-i meşrûh redd-i ferağ etmek üzere merkūma tenbîh olunmak matlûbumdur deyü da‘vâ ettikde ol dahi cevâbında zimmî-i mersûm yedimden kabzını mu‘terife olduğu meblağ-ı merkūm altı yüz guruş mukābelesinde zikr olunan bir bâb manav dükkânı ile eskici dükkânının sülüse-i erbâ‘ını bâ-re’y-i mütevellî bana kat‘iyyen fâriğ olup zikr olunan dükkânlara müte‘allika da‘vâdan zimmetimi kabûlü hâvi ibrâ dahi etmişdi deyü eylediği def‘ini isbât için şâhid olmak üzere bundan akdem [92b] teftîş mahkemesine ikāme eylediği iki nefer kimesnelerin hîn-i tezkiyede şâhid-i zor oldukları muvâcehelerinde ihbâr olunmuş olmağla şer‘an makbûle olmadığından mâ‘adâ sâlifü’z-zikr dükkânların târih-i merkūmda hîn-i ferağda ve hâlâ bedel-i misli bin beş yüz guruş olduğu bî-garaz erbâb-ı vukūf haber verdiklerinde zimmî-i mesfûrun yedinde olan bir kıt‘a i‘lâm nâtık olup ol vechile mezbûr es-Seyyid Mehmed’in da‘vâ-yı mezkûresini husûs-ı merkūmun zâhir-i hâli mükzib olduğuna binâen zimmî-i mersûm ber-vech-i meşrûh eylediği vefâ da‘vâsını mahallinde lede’t-tezkiye adl ve makbûlü’ş-şehâde idükleri ihbâr olunan Tarakçı Abdullah b. Hüseyin ve Hâfız Mustafa b. Osman ve Mehmed Reşid b. Süleyman nâm kimesneler şehâdetleriyle def‘a-i sâniyede arz odasında huzûr-ı âsafânelerinde ma‘kūd meclis-i şer‘de bi’l-muvâcehe vech-i vecih-i şer‘î üzere isbât etmeğin mûcebince meblağ-ı mezbûr altı yüz guruşu mersûm İstefan zimmînin yedinden kabz-birle zikr olunan dükkânlardan keff-i yed ve bâ-re’y-i mütevellî redd-i ferağ etmek üzere mezbûr es-Seyyid Mehmed’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-15 min Za sene [1]217