İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 523 Hüküm no: 616 Orijinal metin no: [92b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucuzâde Abdurrahim Efendi’nin vefâtı üzerine, Takfur v. Bedros ve ortağı Mardros v. Mikail’e olan borcunu kefaletinden dolayı eşi Şerife Habîbe Hanım’ın ödemesi gerektiği 16.686 guruş 80 akçe kefâletine binâen 900 guruşa sulh-i merhûm Turşucuzâde zevcesi Ma‘rûz Bezzâz esnâfından Takfur v. Bedros ve şerîki Mardros v. Mikail zimmîler meclis-i şer‘-i münîrde muvakkaten Şam-ı şerîf kādısı olup bundan akdem esnâ-yı tarîkde Beyat nâm merhalede irtihâl-i dâr-ı bekā eden mevâlî-i izâmdan Turşucuzâde es-Seyyid Abdurrahim Efendi b. es-Seyyid Mustafa Efendi’nin zevcesi zâtı ta‘rîf-i şer‘î ile mu‘arrefe olan Şerîfe Habîbe bt. es-Seyyid Mehmed mahzarında bizim merhûm-ı mûmâ-ileyh es-Seyyid Abdurrahim Efendi [93a] zimmetinde bâ-temessük cihet-i karzdan elli bin guruş hakkım olup ve meblağ-ı mezbûra zevcesi mezbûre Şerîfe Habîbe Hanım ile gāibân ani’l-meclis Hıfzı Efendi ve es-Seyyid Hâfız Mustafa Efendiler ma‘an hayatında tarefeynden bi’l-emr ve’l-kabûl kefîl ve zâmin olmalarıyla ol vechile meblağ-ı mekfûlün-bih-i merkūmdan mezbûre Şerîfe Habîbe Hanım’ın hissesine lâzım gelen on altı bin altı yüz altmış altı guruş seksen akçeyi kefâlet-i mezkûresine binâen mezbûre Şerîfe Habîbe Hanım’dan taleb ve da‘vâ eylediğimizde ol dahi müdde‘âmızı inkâr ve ol vechile beynimizde ba‘de vukū‘ı’l-münâza‘a bâ-vesâtet-ı muslihîn biz ber-minvâl-i muharrer tasaddî eylediğimiz mûceb-i kefâletden ancak zevce-i mezbûre Şerîfe Habîbe Hanım ile bi’t-tav‘ ve’r-rızâ dokuz yüz guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ zikr olunan mûceb-i kefâletine binâen ziyâde meblağ-ı mütâlebemize müte‘allika âmme-i de‘avîden ancak mezbûre Şerîfe Habîbe Hanım’ın zimmetini kabûlü hâvi ibrâ ve iskāt eyledik deyü mukırrân-ı mesfûrânın takrîr-i meşrûhlarını mezbûre Şerîfe Habîbe Hanım tasdîk ve sâlifü’l-beyân ibrâdan müstesnâ bedel-i sulh-i mezkûr dokuz yüz zimmetinde müdde‘iyân-ı mersûmâna sahîhan deyni olduğunu tâyi‘aten ve kat‘iyyen ikrâr u i‘tirâf etmeğin alâ-mûceb-i i‘tirâfihimâ meblağ-ı merkūm dokuz yüz guruşu müdde‘iyân-ı mesfûrâna bi’t-taleb edâsıyla mezbûre Şerîfe Habîbe Hanım ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-21 min Za sene [1]217