İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 524 Hüküm no: 617 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beynazar oğlu Karabet’in, Yani Mesinezi v. Marko’ya olan borcunu ödeyerek rehnettiği tülbentçi gediğini geri aldığı Örücülerde tülbentçi gediği fekk-i rehin ve ibrâ Ma‘rûz İstanbul’da Çakmakçılar kurbünde Nasuh Ağa hânında mütemekkin tüccârdan Yani Mesinezi v. Marko zimmî meclis-i şer‘-i münîrde tülbentçi esnâfından Beynazar oğlu Karabet zimmî muvâcehesinde mesfûr Karabet zimmînin bâ-i‘lâm-ı şer‘î mahkûmun-bih zimmetinde bana altı bin elli üç guruş deyni mukābelesinde yedinde müstakillen mülkü olan İstanbul’da Örücüler sûkunda Zağferan Hânı civârında kâin bir bâb tülbentçi dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmesini bana rehn ve teslîm ben dahi irtihân ve kabz etmişdim hâlâ mesfûr Karabet zimmî deyni olan meblağ-ı mezkûr altı bin elli üç guruşu bana edâ ve teslîm ben dahi yedinden bi’t-tamam ve’l-kemâl ahz u kabz edip rehn olan âlât-ı lâzıme-i mezkûreyi mesfûr Karabet zimmîye red ve teslîm etmemle ba‘de’l-yevm meblağ-ı mezkûrdan mesfûr Karabet zimmî zimmetinde bir akçe ve bir habbe hakkım ve alacağım ve gedik-i mezkûrda dahi kat‘an alâka ve medhalim kalmayıp ke’l-evvel mesfûr Karabet zimmînin mülk-i mahzı ve hakk-ı sarfıdır dedikde ol dahi tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî-20 min Za sene [1]217