İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 525 Hüküm no: 618 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Hüseyin Beşe b. Feyzullah’ın, Ahmed Ağa b. Mustafa’ya olan borcunu ödemesi gerektiği Bin dokuz yüz guruş hüküm Ma‘rûz İstanbul’da duhân gümrüğü civârında sâkin duhân tüccârından derûn-ı arzuhâlde mezkûrü’l-ism es-Seyyid Ahmed Ağa b. el-Hâc Mustafa meclis-i şer‘-i münîrde Tütüncü Hüseyin Beşe b. Feyzullah hâzır olduğu hâlde sâhib-i arzuhâl Mehterbaşı Hüseyin Ağa b. Osman mahzarında işbu yedimde olup bin iki yüz on altı senesi Zilhicceti’ş-şerîfesinin yedinci günü târihiyle muvarrah bir kıt‘a temessük mantûkunca benim hâzır-ı merkūm Hüseyin Beşe zimmetinde vezn ve fiyatı beynimizde ma‘lûm duhân semeninden gayr-ez teslîmât sahhe’l-bâkī hakkım olan bin dokuz yüz yirmi bir guruşa işbu mezbûr Hüseyin Ağa tarafından bi’l-emr ve’l-kabûl kefâlet-i mutlaka-yı sahîha-i şer‘iyye ile kefîl ve zâmin olup hatta kefâletini hâmiş-i temessüke tahrîr ve temhîr eyledikden sonra meblağ-ı mezbûru târih-i merkūmdan beher şehr ikişer yüz guruş vermek üzere medyûnum hâzır-ı merkūmu te’cîl etmişken hâlâ ecel-i mezkûr hulûl edip meblağ-ı mezbûrdan gerek asîl ve gerek kefîl-i mezbûrân bir akçe ve bir habbe vermemeleriyle meblağ-ı merkūmu kefâletine binâen merkūm Hüseyin Ağa’dan hâlâ taleb ederim deyü hâzır-ı merkūm Hüseyin Beşe tasdîkiyle da‘vâ ettikde mezbûr Hüseyin Ağa cevâbında kaziyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin alâ-mûceb-i i‘tirâfihi meblağ-ı merkūm bin dokuz yüz yirmi bir guruşu müdde‘î-i merkūm es-Seyyid Ahmed Ağa’ya bi-hükmi’l-kefâle edâsıyla mezbûr Hüseyin Ağa ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-25 min Za sene [1]217